Khu pơkuâ tơdroăng cheăng Đảng kong pơlê Gia Lai hiăng môi tuăn tơdroăng pêi pro mâu troăng hơlâ ki phá tơ-ê tiô Tơdroăng pơkâ kơxô̆ 72 dêi Khu xiâm kal kí vâ thăm gâk kring, rak ngăn ƀă mơdêk ivá kuăn pơlê. Tung mê tơtrŏng má môi cho pơkâ mơ’no liăn cheăng vâ chê 300 rơtal liăn ăm hngêi pơkeăng cheăm a kơpong tơkăng kong, kơpong ki pá puât dêi Gia Lai.

Kong pơlê Gia Lai tiô tối hdrối kơjo mơ’no liăn mơjiâng, rơnêu ƀă rôe kế tơmeăm khoăng ăm 24 hngêi pơkeăng cheăm ối tung kơpong tơkăng kong, kơpong pá puât. Mâu tơmeăm mê cho po rơdâ khu hngêi pêi cheăng, mơjiâng nếo kơpong tối hdrối um méa, khăm ngăn mơheăm, khăm ngăn tung châ, thâ pơlât apoăng, tơdroăng ki mơgrúa têa krúa ing hngêi pơkeăng ƀă mâu tơmeăm ki gum tơ’nôm.

Tâi tâng kơxô̆ liăn tiô tối hdrối ăm tơdroăng kố dâng 288 rơtal liăn, tung mê 216 rơtal liăn ăm rơnêu kân lĕm, po rơdâ hngêi trăng troăng klông ƀă dâng 72 rơtal liăn vâ rôe kế tơmeăm kơmăi kơmok khăm, séa ngăn tung châ, kơmăi khăm ngăn mơheăm, tơmeăm thâ pơlât ƀă mơdât pơreăng tâ tú. Rơtế ƀă mơ’no tơmeăm khoăng, kong pơlê Gia Lai xuân pơkâ pêi pro troăng hơlâ khăm ivá rêm hneăng tê kơtê ăm kuăn pơlê a 12 cheăm tơkăng kong, rơlố têa kơxĭ, tíu pá puât.