Hôp tơno tơdroăng kal châ pêi pro tiô troăng tơdrêng ƀă tơdrêng tung um tiô troăng hyôh măng troh 33 tíu hrik hyôh a mâu kong pơlê, pơlê kong kân. Kăn xiâm hnê ngăn Kuô̆k hô̆i tối nhên, hneăng cheăng pơla kố nah cho môi hnoăng cheăng ki kal dêi Hô̆i đong kuăn pơlê mâu râ, tơnêi têa thế trâm ƀă hên pá puât, pơloăng mơnúa tá hâi chói ai: pơreăng kân COVID- 19, kong prâi pro ôh tá tơniăn, kong prâi hơ’lêh pro tro lŭp ó; tơdroăng lâp plâi tơnêi ôh tá tơniăn rĕng, pá puât. Đảng, Tơnêi têa tơbleăng, pêi pro hên troăng pơkâ pêi ton xŏn ‘na pơhlêh nếo troăng pêi tơtêk, pơhlêh xúa kŏng ngê̆ kơxô̆ tơnêi têa, rơnêu nếo khu pêi cheăng, xing xoăng râ, xing xoăng hnoăng ƀă rah xo bro lế lĕm tro tíu pêi cheăng tơnêi têa.

Tung pơla mê, ing pơkuâ, hnê mơhno kơtăng dêi Tơnêi têa, Hô̆i đong kuăn pơlê mâu râ hiăng mơ-eăm tơkâ hluâ pá puât, pơtối mơnhên hnoăng cho kơ koan ai hnoăng kân tơnêi têa, kong pơlê, teăng mâ ăm tơdroăng ki khŏm mơ-eăm, tơdroăng pói vâ ƀă hnoăng pơkuâ dêi Kuăn pơlê. Laga, kăn xiâm hnê ngăn Kuô̆k hô̆i xuân tối, tơdroăng pêi pro troăng pêi khu râ kăn pơkuâ péa râ ối hên pá puât, pơloăng mơnúa; kơpong pơkuâ kân rơdâ tâ, kơxô̆ tơdroăng cheăng hên tâ, pơkâ hên tâ; tơdroăng chiâng pêi cheăng dêi kăn ƀô̆ a mâu cheăm tá hâi chiâng tâi, tơmeăm khoăng, kŏng ngê̆ thông tin tá hâi tơdâng tơ’mô.

Pôa Trần Thanh Mẫn, Kăn xiâm hnê ngăn Kuôk hô̆i pơkâ thế Hô̆i đong kuăn pơlê mâu râ ai khŏm mơ-eăm nếo, tơmiât pêi nếo, troăng pêi nếo, mơjiâng troăng mơnhông châ tơƀrê hluâ pơkâ, xúa khoa hok kŏng ngê̆, pơhlêh xúa kŏng ngê̆, tuăn ngôa rơkê tung pêi cheăng.