Việt Nam ƀă Siam cho péa tơnêi têa hmâ chê, ai hên ki pơxúa vâ môi tiah pơtối rak vế hơniâp, tơniăn, tơrŭm ƀă mơnhông a kơpong. Luâ vâ chê 50 hơnăm riân sap mơjiâng tơrŭm tơpui kâ, tơdroăng tơrŭm pơla péa tơnêi têa ôh tá la lâi pơtê châ mơnhông  rơdêi, tŭm tơdroăng, chiâng môi tung mâu tơdroăng tơrŭm ki rơkê ƀă ai pơxúa má môi tung ASEAN. Siam nôkố cho kong têa tơrŭm cheăng ki kân má môi dêi Việt Nam tung ASEAN, ƀă tê mơdró pơla péa pâ hơnăm 2025 châ lối 22 rơtal USD. Péa pâ cheăng kâ rế tơrŭm trâu tâ tung tơdroăng rôe tơmeăm tung kơpong.

Klêi tơpui tơno, pôa Tô Lâm ƀă pôa Anutin Charnvirakul, Ngế pro xiâm hnê ngăn kong têa Siam hiăng hlo ƀă mâ Leh pơcháu mâu hlá mơ-éa kĭ tơrŭm cheăng pơla mâu khu xiâm, kơvâ cheăng dêi péa tơnêi têa. Rôh kố, pôa Tô Lâm ƀă Ngế pro xiâm hnê ngăn kong têa Siam hiăng rơtế tiê a tíu ki pơxiâm tơbleăng xúa logo tơbâ 50 hơnăm mơjiâng tơrŭm tơpui kâ pơla Việt Nam - Siam.