VOV4.Xơ Đăng - Hâi lơ 23/2, kong pơlê Gia Lai châ hlo 662 ngế tro tâ COVID-19. Kố cho kơxô̆ mơngế tro tâ hên má môi tung pơla 1 hâi a kong pơlê xêo sap apoăng rơnó pơreăng troh nôkố. Pơtối mê, pơlê kong kơdrâm Plei Ku cho pơlê kong kơdrâm ai kơxô̆ mơngế tro tâ hên má môi tung kong pơlê. Mâu tơring ai kơxô̆ mơngế tro tâ hên pơtối mê cho tơring Čư Păh (67 ngế), tơring Kƀang (58 ngế), tơring Čư Prông (50 ngế).

Môi ngế hok tro a pơlê kong kơdrâm Plei Ku châ tôe xo têa môh khăm ngăn COVID-19

Pôa Nguyễn Đình Tuấn, Kăn phŏ pơkuâ Khu pơkuâ ngăn pơkeăng ƀă khăm pơlât kong pơlê Gia Lai tối ăm ‘nâi, xiâm kối cho xua hdrối ƀă tung Têt Lo hơnăm nếo, kơxô̆ mơngế vêh ing kong pơlê Gia Lai kơdrâm ƀă ai tơdroăng kuăn pơlê ôh tá bê tơmâng xua hiăng châ pâk vaccine. Mơhé kơxô̆ mơngế tro tâ COVID-19 tâk hên, laga lối 94% kơxô̆ mơngế tro tâ ki ôh tá râ, lơ ôh tá hlo châi pakong; kơxô̆ mơngế châi râ iâ; kơxô̆ mơngế hlâ iâ.

Tiah mê, xêo sap ing hâi lơ 26/4/2021 troh lơ 23/2/2022, kong pơlê Gia Lai châ hlo lối 16.900 ngế yương tĭnh ƀă SARS-CoV-2. Nôkố ai 45 ngế hlâ ƀă u ối 1.400 ngế dế pơlât a mâu hngêi pơkeăng a kong pơlê.

A Sa Ly tơplôu ƀă tơbleăng