Bêng Hoài Nhơn Bắc cho bêng ki pêi cheăng kơhnâ djâ troăng ahdrối tung mơjiâng troăng mơhnhôk tâi tâng kuăn pơlê kring vế tơniăn Tơnêi têa ƀă hên túa kô athế pêi pro, mê cho “Hnê tối tro - Tơleăng pro pơlĕm - Tah lôi tơdroăng ôh tá môi tuăn lơ tơhôu dêi rơpó”, “Khu vâi kơdrâi hbrâ mơdât khu ‘mêi hêak pơloi tung măng internet”. Tơdrốu khế apoăng hơnăm 2026, kuăn pơlê tung bêng hiăng tối ăm ‘nâi 42 tơdroăng ki ai pơxúa, kum mâu khu râ pơkuâ cheăng hbrâ mơdât, tơplâ ƀă mâu ki ai xôi hlối pơxâu phâk hên tơdroăng xôi a mâu pơlê pơla, cheăm bêng.

Pôa Trần Hữu Thảo, Kăn hnê ngăn Đảng  ủi, Kăn hnê ngăn Hô̆i đong kuăn pơlê bêng Hoài Nhơn Bắc, kong pơlê Gia Lai ăm ‘nâi, rak tơniăn a pơlê pơla, cheăm bêng cho hnoăng pêi pro dêi tâi tâng khu cheăng kal kí, dêi rêm ngế kuăn pơlê.

“Châ ai tơniăn ‘nôi mê nếo chiâng mơnhông ‘na cheăng kâ, tơdroăng rêh ối dêi tơrêm rơpŏng nếo chiâng phâi tơtô, hơniâp ro. Xua mê, rak tơniăn ôh ti xê to tơdroăng pêi pro krê dêi mâu kŏng an mê ối cho hnoăng cheăng pêi ƀă hnoăng ki pơxúa kân khât dêi rêm ngế kuăn pơlê pin”.

A hâi hôp, Đăi tươ̆ng Trịnh Văn Quyết khĕn kơdeăn mâu tơdroăng ki hiăng châ Đảng ƀô̆, mâu kăn pơkuâ hnê ngăn ƀă kuăn pơlê bêng Hoài Nhơn Bắc, kong pơlê Gia Lai pêi châ tơƀrê tung mơjiâng tơdroăng mơhnhôk tâi tâng kuăn pơlê tơveăng kring vế tơniăn Tơnêi têa. Đăi tươ̆ng tối, kring vế tơniăn Tơnêi têa cho tơdroăng pêi pro dêi tâi tâng kuăn pơlê ing hnoăng pơkuâ hnê mơhno dêi Đảng, tung mê, ai mâu lêng Kŏng an kuăn pơlê cho mâu ki xiâm.

Vâ rak tơniăn ing apoăng, ing hơngế mê thế rak ing xiâm rêi, “xiâm rêi mê cho hiâm mơno kuăn pơlê”. Tơdroăng mơhnhôk tâi tâng kuăn pơlê veăng kring tơniăn tơnêi têa vâ mơnhông tơƀrê ki khât, ki kal athế tơmâng ngăn, tŏng kum khât troh tơdroăng rêh ối pơlê pơla, rak tơniăn ăm kuăn pơlê châ xúa hnoăng pêi pro châ mơnhông tơƀrê.

Ngế pơkuâ Khu cheăng kal kí tíu xiâm tơnêi têa pơkâ thế Gia Lai pơtối hnê ƀă tơbleăng pêi thăm rế mơdêi tâ nếo mâu pơkâ dêi Tíu xiâm ‘na mơjiâng cheăm pêi pro tro luât ki tơniăn, túa lĕm tro ƀă troăng hơlâ  kring vế tơniăn tơnêi têa; pơ‘lêh nếo cheăng hnê tối, mơdêk ivá cheăng  drêng ai tơdroăng ‘mêi tung măng internet; mơdêk tơrŭm pơla kŏng an, mâu lêng, Măt trâ̆n, tơnêi têa ƀă mâu khu râ, chiâng mâu khu kŏng an pêi cheăng achê kuăn pơlê, nhoăm kuăn pơlê, hlê kuăn pơlê, xua vâ gum ăm tơná kuăn pơlê.

Đăi tươ̆ng Trịnh Văn Quyết xuân pơkâ thế kong pơlê Gia Lai tí tăng ‘nâi plĕng rah xo bêng Hoài Nhơn Bắc pro tíu mơnúa ‘’bêng xah hô̆i chuh ngiah":

“Á thế kong pơlê Gia Lai tăng ‘nâi plĕng rah xo bêng Hoài Nhơn Bắc cho môi tung mâu tíu ki mơnúa dêi bêng xah hô̆i chuh ngiah ing tơdroăng pêi pro tro luât, rak tơniăn, rơkê plĕng, tơtro, mơnhông tiô pơkâ kơxô̆ 18. Pin tơbleăng tơrêm tơdroăng pêi pro tro khât, pro krá ƀă ai hlâu tơmeăm vâ pơtối po rơdâ”.