Klêi môi khế pêi cheăng dêi kăn xiâm péa râ, 135 to cheăm, bêng dêi kong pơlê Gia Lai kô tơniăn tơkŭm po hên pơkâ cheăng kâ rêh ối pơlê pơla châ tơƀrê hên. Ing mê, kong pơlê pơkâ pêi châ tâk 6 khế mơ’nui hơnăm lối 7%. Vâ châ tiô pơkâ tâk mê, kong pơlê pơcháu ăm 77 to cheăm bêng, peăng mâ hâi Lu, dêi kong pơlê Gia Lai ton mâu pơkâ cheăng kâ rêh ối - rak ngăn - pơkâ hdró. Mâu pơkâ mê châ pơ’lêh chiâng 23 tơdroăng cheăng.

Vi ƀan kong pơlê Gia Lai pơkâ thế mâu cheăm bêng  kong pơlê  thâ mơjiâng pro hlá mơ-éa mơnhông cheăng kâ-rêh ối 6 khế mơ’nui hơnăm. La tơdrêng amê, pơtối mơjiâng khu kăn xiâm cheăm bêng mơnhông rơdêi cheăng kâ ing tơdroăng rak ngăn, séa ngăn troh pêi, nếo pêi, rơté ƀă ‘mâi hơ’lêh pro hlá mơ-éa, achê kuăn pơlê, ƀă kuăn pơlê ƀă tơleăng mơnhên tŭm tơdroăng kal vâ khât dêi kuăn pơlê, khu mơdró.  Kong pơlê ‘no liăn mơjiâng tơ’nôm tíu pêi cheăng, tơmeăm khoăng ƀă hlối  xoăng mơngế pêi cheăng ăm tơtro ƀă mâu tíu pơkuâ cheăng râ cheăm, bêng. Tung mâu  tơdroăng cheăng pêi tơdrêng, kong pơlê kô tơkŭm ăm mâu kăn lăm chu troh a cheăm bêng vâ hnê pêi cheăng kơdroh ki xơpá tơvâ tơvân.