Klêi kơ’nâi ‘mot tơkŭm, Gia Lai hiăng pro pơkâ ôh tá chiâng lôi ƀă Po mơdĭng “Ki lĕm ro dêi kong ngo – Têa kơxĭ ngiât tơkŭm”. Sap ing mâu hơlâ troăng prôk ki kŭn tung pơlê, chêng koăng lo troh a têa kơxĭ kân, kơhnhon xuăng tơrŭm ƀă tơchok chal krâ; í pôh, tơxông prông kong ngo ai mâ rơtế ƀă ká ngừ têa kơxĭ. Tơdroăng pơtroh dêi Gia Lai a rôh po tơdroăng cho kong pơlê kô tơrŭm túa lĕm tro 2 kơpong mâ hâi Lo-mâ hâi Lâ, tơrŭm khôi túa lĕm tro kố hmâ ƀă mơjiâng pro ôm hyô kong kế, nhâ loăng, túa lĕm tro, ton nah ƀă têa kơxĭ ngiât. Ngê̆ nhân ối nếo Rčom Bus, a Pleiku, tối ro drêng rôh apoăng tŏn chêng koăng a kĭng têa kơxĭ Quy Nhơn.

“Hlo po mơdĭng kố gá hên túa ƀă ro drêng châ tơkŭm tơdjuôm idrâp po mơdĭng ki hơniâp lĕm xua ngin ối a peăng Gia Lai kơpong ngo, akố cho Gia Lai kơpong têa kơxĭ tơrŭm mot ƀă dêi pó mê á hlo rôh tŏn chêng kố rế hơniâp ro tâ”.

Hlo tơnêi tơníu mơnhông ôm hyô po rơdâ, mâu khu mơdró kâ ki pơkuâ djâ tơmối a Gia Lai xuân hiăng veăng tơrŭm. Jâ Hoàng Thị Thu Sen, Kăn pơkuâ Vietravel tíu pêi cheăng a Bình Định tối ăm ‘nâi, kŏng ti bu po tơ’nôm ƀơrô cheăng a Pleiku, mê ối kơchuâ chêh pro hên kế tơmeăm ôm hyô “lăm tung kong – chu a têa kơxĭ”. Tiô jâ, bu tung pơla môi rôh lăm, tơmối châ ngăn hyôh kong prâi phá tơ-ê peăng mâ hâi Lo – mâ hâi Lâ Trường Sơn, tăng ngăn kế tơmeăm túa lĕm tro, tơdroăng ton nah Tây Nguyên, mê nếo ối pơtê a kĭng têa kơxĭ xŏn lối 130km dêi peăng mâ hâi Lo kong pơlê.

“Ki eăng dêi mâ hâi Lâ kong pơlê Gia Lai ngin chiâng vâ mơjiâng pro tơdrêng hlối mâu kế tơmeăm ki nếo ăm tơmối lăm troh akố, pơla têa kơxĭ ƀă kong, mê ngin kô mơjiâng pro kế tơmeăm ‘na túa lĕm tro-ton nah, mot trâu hơngế tung khu tour ki kố. Mâu tíu troh a Gia Lai xuân kal ‘no liăn pro. Tung rôh lăm ôm hyô ngăn môi tiah ngo Čư̆ Đăng Ya, troăng prôk mê chiâng vâ to rơxế 54 tăng ‘nân la bu prôk châ môi troăng, mâu xiâm loăng 2 pâ troăng kal pro phuâng lĕm, tơ’lêi hlâu ăm mâu khu ki chiân tơmối ôm hyô troh. Rôh lăm ngăn kố ngin kô chêh ‘mot trâu tâ mâu kế tơmeăm túa lĕm tro ton nah”.

Ƀă khu mơdró kâ ôm hyô, tơdroăng ki tơrŭm môi Gia Lai – Bình Định châ ngăn cho hvêa prôk vâ vêh pro túa tơmiât mơnhông. Pôa Nguyễn Tấn Thành, Kăn hnê ngăn Khu tơrŭm Ôm hyô Gia Lai hdrối nah – tối, kố ôh ti xê cho vêh klâ xoăng tơnêi tơníu, mê kal tâ cho po rôh vâ mơjiâng tơdroăng cheăng tung la ngiâ ôm hyô tơrŭm kơpong, vâ tơkŭm pơhlêh kong kế. Tơdroăng ki phá tơ-ê kong prâi ƀă rơnó xo tơmeăm pơla têa kơxĭ ƀă kong xuân gum kơvâ ôm hyô châ po plâ hơnăm.

“Xua nôkố châ po rơdâ plâ hơnăm. Drêng chiâng 1 kong pơlê mê ôm hyô mâu khế ki iâ kuăn pơlê troh dêi Bình Định hdrối nah mê gá cho tíu ki troh hên a Gia Lai hdrối nah ƀă tơdah tơmối plâ hơnăm. Lăm môi rôh la châ 2 kong kế nhâ loăng, têa kơxĭ pơrá phá, xua mê kô ai hên túa ôm hyô châ po, tơdrêng amê kế tơmeăm ôm hyô gá rế hên tâ, gum tơmối hâk vâ troh pôu ngăn hên tâ”.

Xuân môi tiah khu mơdró kâ, kuăn pơlê a mâu thôn pơlê kong pơlê Gia Lai, sap ing túa pro ôm hyô tung chiâk deăng – pơlê pơla hnho dêi châ, xuân pơkâ tơdroăng tơngah tơdjêp troh a kơxĭ ngiât, ăm kế tơmeăm xiâm dêi tơná tơbleăng ăm tơmối. Nâ H’Uyên Niê a Pơlê ôm hyô pơlê pơla Ia M’Nông, cheăm Ia Ly ai tối tiah kố, tâng kăn pơkuâ vâi vâ môi tuăn khât ƀă vâi krâ kuăn pơlê, gum kuăn pơlê pro ôm hyô rế hía rế rơkê tâ mê gá ti pá vâ pơlê cheăm châ a chê ƀă tơmối ôm hyô kong têa ê.

“Vâ krâu tâ, tơná xuân rơhêng vâ châ hriâm vâ drêng ai tơmối ôm hyô kong têa ê troh, mê kuăn pơlê akố ‘nâi hơ’lâk pro mâu kơphế, têa ôu tơtro ƀă mơngế kong têa ê, malối cho mâu kế kâ vâ ăm tơtro ƀă tơmối Sinuâ, tơmối châu Âu”.

Tiô Kơxop hlá mơ-éa pơchuât tơbleăng tơdroăng cheăng kal kí pơtroh a hneăng hôp Đảng ƀô̆ kong pơlê hneăng hơnăm 2025-2030, Ôm hyô kô cho môi tung Hơnăm ki xiâm ‘na cheăng kâ dêi kong pơlê. Ki xiâm pơkâ pêi nhên cho troh hơnăm 2030 kô tơdah châ 18,5 rơtuh ngế tơmối tung môi hơnăm, tung mê, ai lối 1 rơtuh ngế tơmối kong têa ê. Vâ pêi châ tơdroăng pơkâ kố, Kơvâ ngăn túa lĕm tro Tơ’noăng ivá ƀă Ôm hyô mơ’no 4 troăng hơlâ pêi ki xiâm. Jâ Đỗ Thị Diệu Hạnh, Kăn pơkuâ Khu ngăn Túa lĕm tro Tơ’noăng ivá ƀă Ôm hyô kong pơlê Gia Lai, ăm ‘nâi:

“Tơkŭm rak vế, mơnhông mâu kế tơmeăm kơnía ‘na túa lĕm tro, kong kế nhâ loăng, tơnêi tơníu ai sap ing ton nah. Tơkŭm mơjiâng mơđah tơbleăng inâi dêi ôm hyô, tơkŭm tơdjêp peăng mâ hâi Lo – mâ hâi Lâ, pro ôm hyô a têa kơxĭ, ôm hyô pơlê pơla, ôm hyô lăm mơnúa tăng ngăn. Tơkŭm ‘no liăn pêi cheăng malối cho mơdêk rĕng tơdroăng ki pro mâu tơdroăng tơkêa bro nôkố dế tơbleăng pro a kong pơlê vâ pro tiah lâi tơ’mot tơmối troh ôm hyô vâ sap ing nôkố troh mơ’nui hneăng. Mơ’nui cho tăng liăn ngân mơjiâng pro ôm hyô, pêi lo mâu kế tơmeăm ôm hyô ki lĕm tơviah tung la ngiâ”.

Mê pin hlo, bu tung pơla iâ khế klêi kơ’nâi ‘mot tơkŭm, Gia Lai hiăng pơhlêh ó khât: sap ing tơkŭm po tơdroăng túa lĕm tro, mơhnhôk khu mơdró kâ lăm ngăn, kuăn pơlê pơxiâm pơkâ pêi ƀă rế hía rế mơnhông ivá tơxâng túa pêi pro ôm hyô pơlê pơla, tá troh pơkâ tơdroăng cheăng tung la ngiâ ƀă pơkâ tơdroăng ki vâ pêi ton hơnăm. Hdrối vâ po Hneăng hôp Đảng ƀô̆ kong pơlê, Gia Lai hiăng hbrâ rơnáu ăm hvêa prôk ki nếo, djâ ôm hyô chiâng ivá thăm mơnhông, veăng mơjiâng kong pơlê chiâng tíu xiâm dêi tá Tây Nguyên ƀă kĭng têa kơxĭ peăng tơdế Tơnêi têa.