Tiô pơkâ, kơphô̆ Quy Nhơn ai ƀăng tơnêi dâng 1.191km2, tung mê ai 19 tíu pêi cheăng, pơ’leăng mâ mơngế nôkố dâng 884.000 ngế. Quy Nhơn châ pơkâ pêi chiâng tíu pêi cheăng khoa hok, pơhlêh nếo tơmiât pêi rơkê ƀă tuăn ngoâ rơkê xua kuăn mơngế pro tơxâng tung kơpong ƀă lâp plâi tơnêi; mơnhông ngăn tung tơdroăng cheăng kâ a têa kơxĭ, cheăng ƀă kơmăi kơmok chal nếo, logistics ƀă tê mơdró.

Tung pơla mê, kơphô̆ Pleiku ai ƀăng tơnêi dâng 1.263 km², ai 13 tíu pêi cheăng, pơ’leăng mâ mơngế dâng 559.000 ngế. Pleiku châ mơnhên cho kơphô̆ tíu pêi cheăng kơpong Tây Nguyên, tíu thăm mơnhông peăng mâ hâi Lu, rak hnoăng tơdjêp Tây Nguyên ƀă kơpong kĭng têa kơxĭ ƀă mâu bo cheăng lâp plâi tơnêi. Pleiku kô mơnhông tiô hên kơvâ, tơkŭm tung pêi chiâk deăng xúa kơmăi kơmok chal nếo, kơmăi kơmok uâ pơliê kế tơmeăm logistics, tê mơdró ƀă ôm hyô kong kế nhâ loăng, mơhno túa lĕm tro. Tá péa to kơphô̆ kố châ pơkâ pêi tiô túa ki ai hlâu kơphô̆ túa má II a hơnăm 2050.