Hơnăm hriâm 2026-2027, Hngêi trung Phôh thong Kuăn ngo ai tíu kâ koi ối pơtê râ má môi ƀă râ má péa Pi Năng Tắc, cheăm Bác Ái Đông, kong pơlê Khánh Hoà nếo châ mơiâng nếo ƀă kô pơxiâm ăm mot hnê hriâm, pơhlêh mâu kơƀăng tăng ki hiăng tơ’nhê. Tung tơnêi tíu rơdâ 3 ha 8 sào, hngêi trung ai 18 to lâm hriâm, 60 to kơbong ối pơtê ƀă hngêi tơ’noăng ivá, ai tŭm kế tơmeăm vâ tơniăn ăm tơdroăng hriâm tâp, hmê kơchâi kâ ăm vâ chê 500 ngế hok tro cho hdrông kuăn ngo ki iâ mơngế a kơpong peăng mâ hâi Lu pa hdroh dêi kong pơlê. Tâi tang kơxô̆ liăn ki mơ’no rôe mâu tơmeăm ăm hngêi trung ai 83 rơtal 600 rơtuh liăn. O Kiều Năng Bảo Trâm, hok tro dêi hngêi trung ai tối tiah kố:

“Hngêi trung hiăng pêi pro kêi, lá á o châ hriâm tung hngêi trung ki kân rơdâ, krá lĕm, krúa ƀă ai hên mâu kế tơmeăm ki mơhriâm tŭm. Vâ ngin mâu vâi o ai hngei trung ki hriâm lĕm tơniăn má môi”.

Pôa Bùi Quang Quyền, Kăn ngăn Hngêi trung Phôh thong Kuăn ngo ai tíu kâ koi ối pơtê râ má môi ƀă râ má péa phôh thong Pi Năng Tắc tối tiah kố, tơdrăng ki mơ’no liăn ngân, tơveăng gum vâ hok tro hdrông kuăn ngo châ tơ’lêi hlâu ai hmê kơchâi kâ, châ mơhriâm tơkŭm, tơveăng gum kơdroh ki kơtăn niân ƀă xahpá ‘na tơdroăng hnê hriâm pơla mâu  kơpong, pơla mâu pơlê cheăm:

“Kố cho tơdroăng ki rak vế pêi pro tiô troăng tơdjâ ki kân dêi Đảng, Tơnêi têa vâ tơdroăng hnê hriâm mê thăm rế achê dêi pó tâ. Ôh tá ai tơdroăng ki pro tơklâ, pơrah pơla kơpong kong ngo ƀă kong tơbăng. Vâ la ngiâ rak ki tơdâng tơmô tung hnê mơhriâm ƀă mơnhông luâ tâ kơ mê nếo”.

Vâ thăm mơnhông ki dâi khât tung hnê mơhriâm a kơpong kong a’ngêi, kơpong pơlê cheăm xahpá, rơtế ƀă rôe thăm mâu kơƀăng tăng, kế tơmeăm mơhriâm, Khánh Hoà ối ‘mâi mơnhông rôe, mơjiâng hên kế tơmeăm ki mơhriâm, tơdroăng xah ôm hêi dêi hok tro ƀă mâu troăng tơveăng gum, trối liăn hriâm, têa tôu, hbru gum mâu kơxop hlá mơ-éa mơhriâm, hlá mơ-éa chêh ƀă kế tơmeăm ki mơhriâm. Tơdroăng hok tro lôi pơtê hriâm vâ tơveăng gum dêi nôu pâ, tơdroăng kố hiăng châ tŏng gum ing apoăng, ing ahdrối nah.

Khánh Hoà dế kố ai lối 2 rơtuh 240 rơpâu ngế kuăn pơlê, tung mê, hdrông kuăn ngo ai lối 266.000 ngế. Hơnăm 2026-2027, lâp kong pơlê ai lối 462.000 ngế hok tro châ mơhriâm a 318 to hngêi trung. Tung 3 khế pơtê hdrối kố nah, kong pơlê hiăng mơ’no lối 1.143 rơtal liăn vâ rôe kơƀăng tăng, ‘mâi rơnêu hngêi trung, lâm, kơbong, rôe tơ’nôm mâu kế tơmeăm hnê hriâm ƀă hnê mơjiâng mâu thái cô. Pôa Vũ Ngọc Đương, Kăn hnê ngăn ‘na Hnê hriâm ƀă Hnê mơjiâng tuăn ngôa rơkê dêi kong pơlê Khánh Hoà tối ăm ngin ‘nâi:

“Mâu kơƀăng tăng, kế tơmeăm xúa tung mâu hngêi trung tung lâp kong pơlê hiăng châ mơ’no mơjiâng pro tro tơdroăng. Ing mâu lâm, kơbong hriâm, kế tơmeăm, hngêi ki vâ mơhriâm hên tơdroăng ki ê. Nôu pâ dêi hok tro hiăng vâ môi tuăn, veăng gum drêng pin tối pơtâng, pêi pro tơdroăng kơxô̆ 71, thăm mơdêk ki dâi lĕm khât, chôa ‘lâng hvêa  chêng prôk ki vâ mơnhông thăm dâi lĕm ‘na hnê hriâm tung rêm kơpong, ing mê, mơjiâng tơxâng ki dâi lĕm khât tung hnê mơhriâm tung lâp tơnêi têa”.

Ing hneăng mơhnhôk hok tro troh a tơrêm rơpŏng hngêi, tơveăng gum mơhriâm tâp troh a mơ’no liăn ngân mơjiâng lâm, kơbong, hngêi trung, mê Khánh Hoà dế mơjiâng thăm roh ki tơ’lêi tung mơhriâm tâp ăm hok tro ối a kơpong kong ngo, kơpong pơlê cheăm ki ai kơdrâm hdrông kuăn ngo.