Pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối nhên, troăng hơlâ đảng viên pêi cheăng kâ rơkê cho tơdroăng pêi pro tung pơla pơ’lêh nếo tuăn tơmiât, tối mơgêi tơdroăng pêi pro ƀă mơnhông tơpui leăng dêi Đảng. Xua mê, mâu pơkâ ki nếo thế châ pơtối rak vế mâu luât pơkâ kơtăng ki ai pơxúa ƀă tơleăng mơnhên mâu tơdroăng ki nếo ‘na xúa, tơkŭm pêi cheăng, xing xoăng tê tơmeăm pêi lo ƀă pôu râng hnoăng cheăng dêi đảng viên tung cheăng kâ kơchơ mơdró pêi cheăng tiô troăng xã hội chủ nghiã.

Kăn xiâm pơkuâ hnê ngăn Đảng, Kăn xiâm hnê ngăn tơnêi têa pơkâ thế, mâu pơkâ ki nếo kum đảng viên hmiên tuăn pleăng hnoăng cheăng dêi tơná, mơdró kâ tro tiô luât; kum khu tơrŭm cheăng Đảng rak ngăn tơdroăng ki tro khât; kum kuăn pơlê, khu mơdró khên tơnôu ‘no hnoăng pêi pro tơdâng tơ’mô ƀă tơdrăng dêi khu râ kăn. Mâu pơkâ ki nếo mê thế rơtế ƀă tơdroăng pêi pro tiô Pơkâ 12 ‘na mơjiâng Đảng tung kơpong cheăng kâ krê dêi kuăn pơlê.

Kal thế tơ’mot đảng viên ing mâu khu mơdró kâ kơhnâ rơkê, hlối tơmâng khât troh mâu kŏng nhân kih thuât, kih sư, khu rơkê ‘na khoa hok ƀă mâu ngế pêi cheăng kơhnâ rơkê.