Kơ’nâi lối 2 khế pêi cheăng dêi mâu kăn xiâm kong pơlê péa râ, tơdroăng tơdah xo, pro hlá mơ-éa a mâu cheăm, bêng dêi kong pơlê Gia Lai hlo tơƀrê. Krê ƀă môi péa cheăm, bêng ki xiâm, Vi ƀan kuăn pơlê dêi kong pơlê Gia Lai pơkâ thế rĕng ai Tíu xiâm pêi cheăng pro hlá mơ-éa krê vâ tơdroăng cheăng pêi tơbrê.

Tiô Vi ƀan kuăn pơlê dêi kong pơlê Gia Lai, mâu Tíu xiâm pêi cheăng pro hlá mơ-éa râ cheăm dêi kong pơlê dế pêi cheăng tơbrê, ƀă kơxô̆ ki pro klêi hlá mơ-éa troh hâi pơkâ châ kơpêng 95%. Pôa Lâm Hải Giang, Phŏ Kăn hnê ngăn Vi ƀan kuăn pơlê dêi kong pơlê Gia Lai  ăm ‘nâi, hồ sơ, hlá mơ-éa pro ‘na tơnêi ki hâi pro klêi ối hên tâ mâu tơdroăng cheăng pro hlá mơ-éa ki ê, hâi ai tiô tơdroăng púi vâ dêi kuăn pơlê, malối a mâu bêng ki xiâm.

Pakĭng mê, pơkâ thế mâu cheăm bêng ki ối hên hlá mơ-éa hâi pro klêi mê thế rĕng mơjiâng pro tíu pro hlá mơ-éa krê ăm cheăm vâ tơdroăng pro hlá mơ-éa hmâ achê kuăn pơlê tâ, kơdroh hâi pro ƀă liăn ‘no prôk lăm pro hlá mơ-éa.