VOV4.Xơ Đăng - Kơxo lơ 8/3, Khu pơkuâ Đảng ƀô̆ kong pơlê Gia Lai hiăng tơkŭm po Hneăng hôp ‘na tơdroăng rah xo kăn ƀô̆. Tiô pơkâ dêi Khu pơkuâ tơdroăng cheăng Đảng kong pơlê Gia Lai ‘na pơtroh, rah tơ’nôm kăn ƀô̆, pôa Dương Minh Đức – Tĭnh ủy viên, Kăn phŏ pơkuâ Khu hnê mơhno má môi Vi ƀan séa ngăn tơdroăng cheăng Đảng kong pơlê châ pơtroh pêi cheăng, rah xo pôu râng hnoăng Kăn pơkuâ Ƀơrô cheăng Đảng kong pơlê. Hâi khế pôu râng hnoăng cheăng cho 5 hơnăm sap ing hâi lơ 1/3/2022.

Diâp hlá mơ-eá pơkâ, pôa Hồ Văn Niên loi tơngah, drêng pôu râng hnoăng cheăng nếo, pôa Dương Minh Đức kô pơtối mơnhông ivá, hnoăng cheăng vâ rơtế khu pú hên khu râ kăn pơkuâ, kŏng chưk Ƀơrô Tĭnh ủy kong pơlê tơrŭm môi tuăn; pêi tơtro tơdroăng tơbleăng kum Khu hnê mơhno má môi Tĭnh ủy, Khu pơkuâ tơdroăng cheăng Đảng kong pơlê tung tơdroăng pơkuâ, hnê mơhno, pêi pro mâu hnoăng cheăng kal kí dêi kong pơlê.

Xuân tung tơdroăng dêi hneăng hôp kơxo lơ 8/3, Khu pơkuâ Đảng ƀô̆ kong pơlê Gia Lai hiăng tâ phĭu tơbleăng ăm pêi pro mâu mơ-éa tơbleăng mơngế pêi cheăng rah xo tơ’nôm ngế pêi cheăng tung Vi ƀan séa ngăn Tĭnh ủy kong pơlê hneăng hơnăm 2020 – 2025 ƀă pơhlêh rah xo Khu pơkuâ Đảng ƀô̆ kong pơlê hneăng hơnăm 2020 – 2025.

A Sa Ly tơplôu ƀă tơbleăng