VOV4. Xơ Đăng - Têt Lo hơnăm nếo Nhâm Dần 2022 dế hiăng vâ troh, tơdroăng ki rak vế tơniăn mâu kế tơmeăm ƀă rak tơniăn yă tê kế tơmeăm tung kơchơ cho tơdroăng ki kal châ Khu ngăn cheăng kơmăi kơmok ƀă tê mơdró ƀă mâu tơring, cheăm khu mơdró kâ a Gia Lai hbrâ rơnáu tơbleăng. Tiô Khu ngăn cheăng kơmăi kơmok ƀă tê mơdró kong pơlê Gia Lai, kơxô̆ kế tơmeăm châ mâu tíu pêi cheăng hbrâ ‘măn kơdĭng tiô túa pơkâ tung rôh Têt Lo hơnăm nếo Nhâm Dần kô tâk dâng 15% troh 30% tâng vâ pơchông ƀă mâu khế tung hơnăm.

­Mâu siêu thĭ a Gia Lai hbrâ tŭm mâu kế tơmeăm vâ tê ăm kơchơ tung rôh Têt Nhâm Dần

Krê khế ki vâ chê Têt, tiô tối hdrối tơdroăng ki rơhêng vâ roê kế tơmeăm kô tâk dâng 30% mê kơxô̆ kế tơmeăm ki kal xúa ‘măn kơdĭng châ dâng 9.100 rơtal liăn. Vâ rak tơniăn kế tơmeăm vâ tê tung rôh Têt, Khu ngăn cheăng kơmăi kơmok ƀă tê mơdró pơkâ thế mâu tíu pêi cheăng, khu mơdró kâ tơbleăng túa pơkâ ‘măn kơdĭng kế tơmeăm ki kal rak tơniăn yă, tơdrêng amê hlối tơhrâ kế tơmeăm ki kal athế châ rak tơniăn dâi lĕm, ai hlá mơ-éa chêh mơnhên tŭm, xiâm kối mơjiâng pro. Hbrâ rơnáu mơdât mâu tơdroăng ki ôh tá tơniăn dêi kơchơ mơdró, rak tơniăn hbrâ mơdât pơreăng COVID-19.

Katarina Nga tơplôu ƀă tơbleăng