Tung 22 toăng hngêi kal mơjiâng nếo a cheăm Gào, pơlê kân Pleiku, rơpŏng pôa Siu Kra, ối a pơlê C châ rah xo vâ pro túa mơjiâng pro hngêi ki nếo ahdrối ăm pơlê cheăm. Pôa Siu Kra phiu ro ai tối:

“Á hơniâp ro khât, mơnê pơlê kong kân hiăng tŏng gum ăm rơpŏng hngêi á, cho rơpŏng ki xahpá ó, nôkố hiăng châ ‘mâi rơnêu hngêi ối, ai hngêi nếo, on veăng má phiu ro, tơniăn tuăn ‘nâng”.

Tiô tơdroăng pơkâ, pơlê kong kơdrâm Pleiku kô mơjiâng nếo 41 toăng hngêi ƀă ‘mâi rơnêu 28 toăng hngêi ƀă kơlo ki gum pro ai 60 rơtuh liăn 1 toăng hngêi nếo bă 30 rơtuh liăn môi toăng hngêi ki ‘mâi rơnêu. Pôa Trịnh Duy Thuân, Kăn pơkuâ hnê ngăn Đảng pơlê kong kơdrâm Pleiku tối ăm ‘nâi:

“Pơlê kong kơdrâm Pleiku hiăng tah lôi hngêi pơtân, hngêi xi kơchoh dêi 69 toăng hngêi, ngin vêh mơnhên tối tơdroăng ki ‘mâi rơnếu, mơjiâng pro nếo khŏm kêi tung khế 4/2025, xua mê râ, pâ thế mâu khu râ kơvâ cheăng, mâu tơring, cheăm tŏng gum ó rơdêi tâ. Ƀă hâi khế thâ rĕng môi tiah mê, mâu khu đông lêng, mâu khu mơdró, mâu kơvâ cheăng, mâu kong pơlê pơtối mơdêk hiâm tuăn ki hơ-ui, tŏng gum, khŏm mơ-eăm pêi pro kêi tơdroăng cheăng kố tro tiô hnoăng cheăng xiâm ƀă mâu hnoăng hiăng pơcháu”.

Tối ‘na tơdroăng ki veăng tơdjuôm ivá cheăng tung tah lôi hngêi xi kơchoh, hngêi tơ’nhiê mê, Trung tă Ngô Văn Phôi, Kăn phŏ Trung đoân 48, Sư đoân 320, Kuân đoân 34 ai tối nhên:

“Ngin hiăng mơjiâng khu hnê mơhno, mơjiâng mâu tôh, mâu khu tung hnoăng cheăng hnối tơrŭm krá tơniăn ƀă tơring, cheăm, ki malối cho mâu thôn pơlê, tơkŭm po tơniăn tíu kâ koi, ối pơtê, mơjiâng pro mâu hngêi trăng, tơmeăm khoăng tro tiô pơkâ vâ pêi pro tơniăn tro hnoăng cheăng dêi Chin phuh ƀă kong pơlê hiăng mơ’no, pơcháu”.

Tơdrêng ƀă pơlê kong kơdrâm Pleiku, tâi tâng mâu tơring tung kong pơlê Gia Lai xuân dế thâ rĕng pêi pro klêi hnoăng cheăng ki tah lôi hngêi pơtqân, hngêi tơ’nhiê sap ing khế 3 hơnăm 2025. Cho môi tung mâu ngế ki châ tŏng gum mơjiâng hngêi trăng nếo, nâ Puih Lý (Pơlê Đe Chi, cheăm Ia Pếch, tơring Ia Grai) hơniâp ro sôk suâ tối:

“Tơnêi têa hiăng tŏng gum, ngăn khât tơdroăng ki tơveăng mơjiâng pro hngêi ƀă hnối pơcháu ăm 1 to ro droh, hơnăm ah, on veăng á kô mơ-eăm cheăng kâ vâ tơkâ luâ tơdroăng kơtiê xahpá, ai liăn ngân gum ăm dêi kuăn vâ hriâm tâp”.

Jâ Phạm Thị Kim Tuyến, Phŏ Kăn hnê ngăn Vi ƀan cheăm Ia Pếch, hơniâp ro, sôk suâ ‘na tơdroăng ki ai pơxúa kân khât dêi tơdroăng tŏng gum kố:

“Kố cho tơdroăng ki kân ó khât ƀă ai pơxúa ăm vâi krâ-nhŏng o ki kơtiê xahpá. Troh nôkố, cheăm bu ối pá 20 rơpŏng ki xahpá ‘na hngêi ối, cheăm tơrŭm ƀă khu râ, kơvâ cheăng lăm mơnhên ngăn i nhên khât vâ tơdroăng tŏng gum pro hngêi ối kố châ tơƀrê drêng pơkâ pêi pro”.

Tiô tơdroăng pơkâ, kong pơlê Gia Lai pơkâ pêi pro klêi hnoăng cheăng mơjiâng nếo ƀă ‘mâi rơnêu lối 8.400 toăng hngêi sap ing khế 3 hơnăm 2025 kố ah. Vâ pêi pro kêi hnoăng cheăng kơdroh tah hngêi pơtân, hngêi xi kơchoh tung lâp kong pơlê, Gia Lai mê kal kơxô̆ liăn tâk troh vâ chê 460 rơtal liăn. Tung mê, Khu xiâm pơkuâ hnê ngăn Đảng tơnêi têa hiăng veăng gum ăm kong pơlê kố 241 rơtal liăn, 87 rơtal liăn ing kơxô̆ liăn ki kơdĭng 5% dêi kong pơlê ƀă mâu kong pơlê ki ê. Pôa Hồ Văn Niên, Kăn pơkuâ hnê ngăn Đảng kong pơlê Gia Lai tối ăm ‘nâi, kong pơlê dế pơtối kơ-do mơ-eăm mơhnhôk rêm khu râ, kơvâ cheăng ki ôh tá bê tŭm mơngế pơkuâ cheăng vâ pêi pro kêi hnoăng cheăng ki hiăng pơcháu.

“Xuân u ối 127 rơtal kơxô̆ liăn ki kong pơlê kal vâ, pơtối krếo thế rêm khu râ, kơvâ cheăng tŏng gum, xua mê, Khu hnê mơhno cheăng kong pơlê pơtối pêi cheăng ƀă mâu kơ koan dêi Khu xiấm pơkuâ hnê ngăn Đảng, ki rơhêng vâ tối cho Vi ƀan xiâm Măt trâ̆n tơnêi têa Việt Nam vâ pơtối ai tơdroăng tŏng gum tơ’nôm ƀă kong pơlê Gia Lai. Mâu hnoăng cheăng tung khu hnê mơhno cheăng dêi kong pơlê hiăng pơtối mơdêk hnoăng cheăng pôu râng, seá ngăn, mơnhên hlo, hnê mơhno tối ƀă tí tăng ‘nâi plĕng tơdroăng pơkâ pêi pro a mâu kong pơlê ki hiăng châ xing xoăng, tối pơtâng ki tơƀrê, ki ai pơxúa ki nhên ƀă Khu hnê mơhno cheăng kong pơlê pơtối mơdêk hneăng hôp rêm khế vâ séa mơnhên ngăn ki tơƀrê tung rak vế, pêi pro tung tơrêm khế”.