VOV4.Xơ Đăng - Hâi lơ 4/3, Khu ngăn vâi kơdrâi  kong pơlê Gia Lai tơkŭm po leh tơbleăng inâi hơnăm 2022 ƀă Rôh tơ’noăng tí tăng ‘nâi plĕng tơdroăng pơkâ Hneăng hôp cho vâi kơdrâi pro kăn kong pơlê rôh má 14 hneăng hơnăm 2021 – 2026. Pêi pro hnê mơhno dêi Tíu xiâm ngăn vâi kơdrâi Việt Nam hơnăm 2022, Khu pơkuâ ngăn vâi kơdrâi kong pơlê Gia Lai rah xo inâi “Hơ’lêh nếo, rơkê plĕng tung tối tơbleăng ƀă tơkŭm pêi pro tơdroăng pơkâ hneăng hôp vâi kơdrâi rêm râ” vâ tơbleăng tung lâp kong pơlê.

Gia Lai tơbleăng rôh tơ’noăng Tăng ‘nâi tơdroăng pơkâ mâu vâi kơdrâi kong pơlê rôh má 14

Tung rôh po tơdroăng, Khu ngăn vâi kơdrâi kong pơlê Gia Lai hiăng tơbleăng rôh tơ’noăng ‘Tăng ‘nâi tơdroăng pơkâ hneăng hôp vâi kơdrâi kong pơlê Gia Lai rôh má 14 hneăng hơnăm 2021 – 2026. Rôh tơ’noăng kố pơxiâm sap ing hâi lơ 4/3 ƀă mơgêi a hâi lơ 4/8, châ tơkŭm po tiô tơdroăng ki ‘no tơdrêng ing troăng hyôh Internet, rêm khế môi hneăng.

‘Na ko ƀai kơ-êng, ƀă tơdroăng ki tro ƀă klêi kơ’nêi mâu hneăng tơ’noăng châ mơ’no tung trang Thông tin điê̆n tưh dêi Khu ngăn vâi kơdrâi kong pơlê Gia Lai. Kăn ƀô̆, hô̆i viên, vâi kơdrâi ƀă rêm râ kuăn pơlê nôkố dế rêh ối, pêi cheăng, hriâm tâp a kong pơlê pơrá chiâng vâ veăng tơ’noăng.

Katarina Nga tơplôu ƀă tơbleăng