VOV4.Xơ Đăng - Klêi kơ’nâi lối 3 khế tơbleăng, Khu mơhnhôk Tơdroăng “Hyôh Internet ƀă kơmăi tĭnh ăm o” dêi kong pơlê Gia Lai hiăng tơdah xo hên kơxô̆ liăn veăng tơlo tŏng kum ăm hok tro ki ôh tá ai kế tơmeăm hriâm tơdrêng ing troăng hyôh Internet ƀă kơnâ lối 1,3 rơtal liăn. Khu ngăn hnê hriâm ƀă hnê mơjiâng tuăn ngoâ rơkê kong pơlê Gia Lai tơbleăng: Ing tơdroăng ki séa ngăn, nôkố kong pơlê Gia Lai xuân ối ai lối 37 rơpâu ngế hok tro ối tung rơpŏng xơpá, tá hâi ai kơmăi tĭnh, hyôh Internet vâ hriâm tâp.

Tơdroăng kum ăm hyôh măng internet ƀă kơmăi tĭnh ăm o a kong pơlê Gia Lai

Hlo tơdroăng ki ai khât kố, kơvâ ngăn hnê hriâm ƀă hnê mơjiâng tuăn ngoâ rơkê hiăng châ xo tơdroăng ki môi tuăn sap ing Khu xiâm ngăn hnê hriâm ƀă hnê mơjiâng tuăn ngoâ rơkê vâ pơtối tơbleăng tơdroăng “Hyôh Internet ƀă kơmăi tĭnh ăm o” a Gia Lai ƀă kơxô̆ liăn tâk troh 35 rơtal liăn.

Katarina Nga tơplôu ƀă tơbleăng