A rôh hôp, kăn pơkuâ kong pơlê Gia Lai hiăng tối ‘na troăng tơmiât pêi. Ki nhên, a kơpong Gia Lai peăng mâ hâi Lo (kong pơlê Bình Định hdrối nah), kong pơlê tơkŭm tung tơdroăng uâ pơliê mơdiê, mơjiâng pro; kơmăi kmok túa lĕm tro-ôm hyô; mơjiâng pro on tơhrik, pro kơno tuk ƀă tíu cheăng logistics.

U ối a kơpong Gia Lai peăng mâ hâi Lâ (Gia Lai hdrối nah), kô mơjiâng pro mâu kơpong pêt kế tơmeăm ki kân; tơbleăng pêi tơƀrê mâu tơdroăng tơkêa bro on tơhrik tiô pơkâ on tơhrik VIII; mơjiâng kơpong cheăng kâ bo cheăng lâp lâp plâi tơnêi Lệ Thanh, tơ’mot tơmeăm sap ing Kul vâ uâ pơliê, mơdiê, pro chiâng tơdroăng ki kơnía krá ton.

Pakĭng tơ’mot ‘no liăn cheăng, Gia Lai ối tơkŭm séa ngăn, tŏng gum xơpá ăm mâu tơdroăng tơkêa pro hrá tơbleăng, mơdêi ki loi tơngah tung tơdroăng ‘no liăn pêi cheăng. Pôa Phạm Anh Tuấn, kăn hnê ngăn Vi ƀan kong pơlê Gia Lai ăm ‘nâi, tơdroăng ‘no liăn cheăng nếo bu châ pơhlêh sap ing kong pơlê troh a cheăm bêng.

“Gia Lai mơ-eăm pơhlêh tơdroăng ki ‘no liăn pêi cheăng. Ngin hiăng pơcháu mâu pơkâ KPI troh rêm tíu pêi cheăng ƀă 135 to cheăm, bêng. Mâu cheăm bêng kô tơdah xo, pơhlêh nếo túa ki pơkuâ ngăn sap ing séa ngăn nhên chiâng vâ gum, ngăn kuăn pơlê ƀă khu mơdró kâ cho ngế ki xiâm, cho tơmối dêi kơ koan tơnêi têa. Kong pơlê khŏm mơ-eăm pơkâ tơleăng kơtăng kăn ƀô̆, kong chưk ki pro xôi, pro xơpá ăm tơdroăng mơnhông tơdjuôm dêi kong pơlê ƀă pro pá ăm khu mơdró kâ. Á loi mâu khu mơdró kâ kô ai môi rôh “kăch măng” tối khât, pêi khât ƀă châ tơƀrê khât”.

Veăng hôp a rôh hôp, Tiê̆n sih Trần Du Lịch - Ngế cheăng tung Hô̆i đong Tiâ mơnhên Troăng hơlâ Liăn ngân Tơnêi têa tối tiah kố, ivá pêi cheăng dêi kăn pơkuâ kong pơlê 2 râ nếo cho ivá ‘no liăn pêi cheăng khât. Tâng ai ivá kâi tơ’mot, kô ai hên khu mơdró kâ tro ‘no liăn cheăng a Gia Lai:

“Kơdroh nâp liăn mơhá, ôh tá êa nâp liăn mung tơnêi, la ki kal tâ khu mơdró kâ kal cho kơ koan pêi cheăng ai ivá pêi cheăng tơƀrê, kăn pơkuâ athế cho ngế ki mơnhông khu mơdró kâ. Vâ pro tiah lâi, khu mơdró kâ troh Gia Lai pêi cheăng kâ tơdrăng lĕm, ôh ti tơmiât xâu lơ trâm mâu tơdroăng xơpá klâi”.

A rôh hôp, Vi ƀan hnê ngăn kong pơlê Gia Lai hiăng diâp 69 pơkâ ‘no liăn pêi cheăng, mơ-éa mơnhên ‘no liăn pêi cheăng ƀă kĭ mơ-éa chôu vế tơrŭm cheăng, ƀă tâi tâng kơxô̆ liăn ‘no 4,7 rơtal dollars. Tung kơxô̆ ki kố, ai 27 tơdroăng tơkêa châ diâp pơkâ troăng 'no liăn ƀă mơ-éa mơnhên chêh inâi ‘no liăn, ƀă tâi tâng kơxô̆ ‘no dâng 26.400 rơtal (tơ’mô lối 1 rơtal dollars). Tung mê, ai 13 tơdroăng tơkêa kơmăi kơmok, 14 tơdroăng tơkêa pro troăng klông, tíu pêi cheăng; mâu tơdroăng tơkêa pro on tơhrik ƀă Hngêi pơkeăng.

Pakĭng mê, 42 tơdroăng tơkêa châ kĭ tiô túa ki kĭ mơ-éa tơrŭm cheăng ‘no liăn, ƀă tâi tâng kơxô̆ liăn ‘no pêi cheăng tiô tối hdrối lối 93.400 rơtal (tơ’mô vâ chê 3,6 rơtal dollars). Kố cho kơxô̆ liăn ki hên, mơhno ki loi dêi khu mơdró kâ tung troăng tơmiât mơnhông dêi kong pơlê; cho ivá ki kal vâ pơhlêh troăng mơnhông cheăng kâ, mơdêk ki rơkê ƀă ivá tơbriât. Mâu tơdroăng tơkêa bro ki hên cho tung mâu kơvâ on tơhrik vêh pro; pêt mâu hdrê loăng ƀă păn ká xi xŏng; pêt kong tơrŭm ƀă păn ro, pro hngêi kơmăi pêt - uâ pơliê tơmeăm pêi lo ing chiâk deăng. Jâ Nguyễn Thị Lan Hương – Kăn hnê ngăn Hô̆i đồng Quản trị Kŏng ti Tơlo liăn Mơjiâng pro ƀă Tê ngi kong têa ê Việt Phúc, ngế ki ‘no liăn pêi cheăng tung kơvâ pêi chiâk xúa kơmăi kơmok chal nếo ăm ‘nâi:

“Ngin mơjiâng pro tơdroăng tơkêa bro kơpong pêi chiâk xúa kơmăi kơmok chal nếo a Čư̆ Sê. Kố cho tơdroăng tơkêa ki kal tung kơvâ pêi chiâk deăng ƀă mâu kơpong ki mơdâ pro hdrê, kơpong rak vế gen ƀă kơpong xúa kơmăi kơmok chal nếo. Ngin rơhêng vâ tơdroăng tơkêa kố chiâng tíu tơdjêp mâu kih thuât ki rơkê plĕng, tơdrêng amê hlối hbrâ rơnáu tơrŭm ƀă vâi krâ kuăn pơlê khu pêi cheăng tơrŭm ƀă kuăn pơlê pêi chiâk”.

Rôh hôp Pơkâ mơdêk ‘no liăn pêi cheăng hơnăm 2025 a Gia Lai ôh ti xê po hên rôh tơ’lêi hlâu tơrŭm cheăng ƀă tâi tâng kơxô̆ liăn ‘no lối rơtal dollars, mê ối tối rơdêi ivá khŏm mơ-eăm dêi kong pơlê tung mơjiâng tơdroăng ‘no liăn pêi cheăng tơdrăng, tơ’lêi ƀă krá ton. Ƀă pơkâ mơjiâng pro nhên ăm rêm kơpong, rơtế ƀă tơdroăng pêi pro dêi kăn pơkuâ péa râ ƀă mâu khu mơdró kâ, Gia Lai dế rế hía rế tối rơdêi tíu ối cho tíu troh ai hên tơdroăng ki ai hlâu, tíu ki tơkŭm mâu kơxô̆ liăn vâ mơnhông cheăng kâ ngiât, pêi chiâk deăng xúa kong ngê̆ chal nếo, kơmăi kơmok uâ pơliê ƀă on tơhrik vêh pro. Kố cho ivá ki kal ăm Gia Lai chiâng tíu xiâm mơnhông nếo dêi kơpong Tây Nguyên tung hneăng la ngiâ.