Kong pơlê Gia Lai tiô tối hdrối xing xoăng lối 11 rơpâu rơtal liăn vâ tăng tơnêi ƀă tŏng gum xĕn tíu ối ăm kuăn pơlê drêng pro troăng ki kal prôk tơkâ hluâ péa kong pơlê.

Péa tơdroăng tơkêa bro mê cho troăng kân ăm phêp rơxế kơtâu têi Quy Nhơn – Pleiku ƀă troăng rơxế lơtreng kơtâu têi Peăng kơnhŏng – Peăng hdroh kơpong tơkâ hluâ Gia Lai.

Tung mê, tơdroăng tơkêa bro troăng kân ăm phêp rơxế kơtâu têi Quy Nhơn – Pleiku ai tâi tâng ki xŏn lối 125 km, tâi tâng kơxô̆ liăn mơ’no lối 43 rơpâu rơtal liăn, tâi tâng kơxô̆ liăn chêl thiê̆n, tăng tơnêi ƀă xĕn tíu ối dâng 4.700 rơtal liăn. Troh nôkố, tơdroăng hbrâ tơmeăm bro, vê, riên tơmeăm hiăng kêi đeăng. Kong pơlê dế tơkôm Chin phuh tơbleăng pêi pro Tơdroăng pơkâ vâ tơkŭm po mơjiâng pro. Ƀă troăng kân rơxế lơtreng kơtâu têi, kơpong tơkâ hluâ Gia Lai xŏn 115 km. Kơxô̆ liăn tăng tơnêi dâng 6.400 rơtal liăn.

Kong pơlê hiăng pơkâ pêi 38 kơpong xĕn ối, kum vâ chê 1.600 rơpŏng kuăn pơlê tro tơdjâk. Nôkố 37 kơpong hiăng châ kĭ pơkâ pêi inhên. Péa troăng kân châ mơjiâng po hên tíu mơnhông nếo ăm kong pơlê Gia Lai./.