‘Na 8 tơdroăng kal ai chêh tối tơkŭm hên tung tơbleăng pêi mâu pơkâ troăng hơlâ pêi pro, Tiê̆n sih Bàn Tuấn Năng, Khu mâu ngế rơkê ‘na khoa hok ƀă kong ngê̆ hơnăm ối nếo Việt Nam, malối tơmâng khât troh túa lĕm tro ƀă kuăn mơngế: Xiâm ing tuăn tơmiât dêi pơlê pơla, ivá rơdêi tung rêm ngế, xiâm tơmiât vâ mơ-eăm mơnhông dêi tơnêi têa. Tối tơbleăng a hneăng Hôp kân 14 dêi Đảng hiăng tối nhên: “Mơnhông krá tơniăn ton ki hdrối thế ngăn a kuăn mơngế ƀă túa lĕm tro.

Kal mơjiâng ƀă pêi tơdrêng ki pơxúa dêi tơnêi têa, ki pơxúa túa lĕm tro, ki pơxúa dêi on veăng rơpŏng hngêi hlối tơtro ƀă ki lĕm dêi kuăn mơngế Việt Nam ai tiô pơkâ mơnhông tung mâu hơnăm nếo ƀă hên ki ê”.  Tiê̆n sih Bàn Tuấn Năng tối nhên:

“Túa lĕm tro đi đo châ ngăn cho vâ kum, cho ki xiâm ing  tơdroăng kal. Xiâm tơdroăng mê pro ki rơdêi ing tuăn vâ, cho xiâm ki vâ mơnhông rơdêi tơnêi têa. Krê ki tơbrê ‘na hnê hriâm môi tiah a rôh hdrối kô nah pin hiăng hlo mâu luât pơkâ, mê cho: ôh tá êa nâp liăn hriâm ăm hok tro, vâ môi tuăn ƀă môi khu hlá mơ-éa chêh hriâm tung lâp tơnêi têa... Mê cho mâu tíu ki tơbrê rơdêi, tơpui kơtăng khât tơdroăng Kăn xiâm pơkuâ hnê ngăn Đảng hiăng hnê pêi pro ƀă Chin phuh, mâu khu xiâm, kơvâ cheăng dế pêi pro).

Pôa Nguyễn Quang Đồng, Viện trưởng Viện Nghiên cứu Chính sách ƀă Phát triển Truyền thông (IPS) hâk vâ tơdroăng tơpui ‘na khoa hok, kŏng ngê̆, pơ’lêh nếo hriăn plĕng ki nếo ƀă pơ’lêh kơxô̆: Cho ki xiâm dêi tơdroăng mơnhông tơbrê. Pôa tối ăm ‘nâi:

“Pin hiăng hlo túa mơnhông cheăng kâ tiah hmâ tung 40 hơnăm kơ’nâi pơ’lêh nếo hiăng châ troh mâu kơdró. Tâng ôh tá ‘no liăn pêi cheăng rơdêi hên ‘na khoa hok kong ngê̆ mê ôh tá kâi vâ mơnhông châ pơ’lêh nếo ƀă mơdêk ivá pêi lo hên tơmeăm, ing mê, mơdêk ki rơdêi Việt Nam tiô tơdroăng pê lo tơmeăm pơxúa a tung tơnêi têa ƀă ki pơxúa tung lâp plâi tơnêi. Xua mê, á tơmiât  pêi dâi khât luâ tâ khoa hok kong ngê̆ cho tơdroăng kal pêi hdrối môi tiah ai chêh tung Hlá mơ-éa hiăng tối tơbleăng”.

Vâ ƀă tơdroăng mê, pôa Vũ Hoàng Liên, Kăn xiâm hnê ngăn Khu tơrŭm cheăng Internet Việt Nam, tối ki môi tuăn hên ƀă troăng hơlâ ki kân ‘na mơnhông mơdêk khoa hok kong ngê̆, túa lĕm tro kuăn mơngế châ tối tung hlá mơ-éa chêh tơbleăng ‘na mâu tơdroăng pơtoh a hneăng Hôp kân 14 dêi Đảng:

“Vâ tối ‘ló khât ƀă rôh ki tơ’lêi hlối tro khât ƀă mâu tơdroăng ki ai khât ƀă tơdroăng rêh ối cheăng kâ dêi Việt Nam, kuăn mơngế Việt Nam. Tơdroăng hnê mơhno pêi pro môi tiah mê cho teăm ƀă cho rôh tơ’lêi ăm Việt Nam tung tơdroăng pêi cheăng vâ châ tơƀrê luâ tâ mơnhông krá kak thế ngăn a khoa hok kong ngê̆, hơ’lêh nếo hriăn plĕng ki nếo ƀă pơ’lêh kơxô̆”.