VOV4.Xơ Đăng - Vâ hbrâ mơdât pơreăng, tung roh Têt Lo hơnăm nếo Nhâm Dần, pơlê kong kân Hà Nội, pơkâ mâu tơring, bêng tơkŭm, hbrâ rêm tơdroăng, ki má lối cho tung pơla pơlê kong kân hiăng ai ngế tro tâ pơreăng Omicron. Mâu hâi hiăng hluâ, rêm hâi pơlê kong kân châ hlo dâng 2.900 ngế tro tâ. Kơxô̆ ngế tro tâ dế châ mơdât tơtro, laga tiô tối hdrối măng tĭng pơtối kô châ hlo kơlo ki kơdroh ‘’ki ôh tá khât’’ xua kuăn pơlê vêh pơlê xiâm tơdah Têt ƀă kô vêh tâk klêi kơ’nâi têt’’.

Nôkố, pơlê kong kân dế a râ má 2 tung hbrâ, mơdât pơreăng. Pơlê kong kân hiăng châ hlo 14 ngế tro tâ pơreăng Omicron. Pơreăng nếo hiăng xông tâ tú a Hà Nội, tơ’lêi tâ tú tung pơlê pơla mơni kô ai. Xua mê, kal séa ngăn nhên ƀă pêi pro mâu troăng mơdât pơreăng xông tâ tú tơniăn ƀă mâu ngế ki tro tâ pơreăng kố. Khu pơkuâ ngăn pơkeăng ƀă khăm pơlât Hà Nội pơkâ thế mâu hngêi pơkeăng thế tơkŭm po tơtro tơdroăng thâ pơlât, khăm, pơlât ăm kuăn pơlê, tơniăn mơngế tro tâ pơreăng thâ pơlât châ khăm ƀă pơlât teăm tơdrêng, ôh tá chiâng ôh tá vâ lơ hrá pơlât.

A Sa Ly tơplôu ƀă tơbleăng