Ƀă tơdroăng pơxá “Pơtối rak túa lĕm tro rơpâu hơnăm rơkê lĕm ƀă khên tơnôu; môi tuăn mơjiâng Đảng ƀô̆ krúa rơdêi; djâ troăng a hdrối, tơƀrê tung chal nếo; mơnhông pơlê xiâm rơkê plĕng, túa nếo nôkố, hơniâp tơniăn”, a kơxo hâi lơ 16/10 hiăng po hneăng hôp kân mâu Đảng ƀô̆ pơlê kong kân Hà Nội rôh má 18, hneăng 2025-2030  ƀă veăng dêi 350 ngế kăn. Tiô tối tơbleăng kal kí hneăng Hôp, hneăng hdrối nah mâu pơkâ vâ tối hiăng pêi châ tiô pơkâ ki ‘nâ luâ hnoăng pơcháu, cheăng kâ pơlê kong xiâm ôh tá la lâi pơtê mơnhông ƀă kơlo tâk hên lối tâng riên tung lâp tơnêi têa.

Tơbleăng hnê mơhno a hneăng hôp, pôa Tô Lâm Kăn xiâm pơkuâ ngăn Đảng tối nhên: Tơnêi têa pin, Pơlê kong xiâm pin dế pơxiâm mot tung chal nếo mơnhông tơƀrê nếo dêi hdroâng mơngế ƀă cho rôh, tơ’lêi hlâu ƀă xơpá, pơloăng mơnúa tơvât ƀăng.

Kăn xiâm pơkuâ hnê ngăn Đảng tơbâ 7 tơdroăng pơkâ, tơdroăng cheăng vâ Đảng ƀô̆ Pơlê kong kân Hà Nội tơkŭm pơkuâ hnê mơhno pêi cheăng tung hnăng la ngiâ. Pôa Tô Lâm - Kăn xiâm pơkuâ hnê ngăn Đảng pơkâ thế, Hà Nội thế ‘mâi mơnhông nếo môi tiah “Pơlê kong kân rơkê plĕng - tro tiô khôi túa lĕm - hriăn plĕng ki nếo vâ chiâng môi “pơlê kong xiâm rơkê plĕng - pêi cheăng tiô túa nếo - krá rơdêi” ƀă tuăn ngôa rơkê tiô túa nếo hlối tơxâng ƀă lâp plâi tơnêi.  Ing mê, chiâng ai “3 tơdroăng hriĕn plĕng”, tăng pơtối rak vế tâi tơdroăng ki kơnía ton nah, tuăn ngôa rơkê, kơmăi kơmok, mơnhông Hà Nội chiâng pơlê kong xiâm tơkŭm hên tơdroăng ki lĕm ing ton nah, nôkố ƀă tung la ngiâ.