Tiô rơkong krếo thế dêi pôa Tô Lâm, Kăn xiâm pơkuâ hnê ngăn Đảng Kŏng san Việt Nam ƀă Kơdrâi pôa, hâi lơ lơ 26/1, Kăn xiâm pơkuâ hnê ngăn Đảng Nhân yân Kăch măng Lếo, Kăn xiâm hnê ngăn Kŏng hoa Yân chuh Nhân yân Lếo Thongloun Sisoulith ƀă Kơdrâi pôa pơxiâm mâu tơdoăng pêi cheăng râ Tơnêi têa troh Việt Nam, ton troh hâi lơ 27/1.

Tơdroăng Kăn xiâm pơkuâ hnê ngăn Đảng, Kăn xiâm hnê ngăn kong têa Lếo rah xo Việt Nam cho tíu troh apoăng klêi kơ’nâi Hneăng hôp kăn teăng mâ lâp tơnêi têa roh má XII dêi Đảng Nhân yân Kăch măng Lếo mơhno nhên Lếo đi đo nhuô̆m ƀă kơjo má môi tơrŭm cheăng ƀă Việt Nam tung troăng hơlâ tơpui kâ ƀă kong têa ê.

Roh lăm pôu vâ tơdrêng rơkâu châ tơƀrê Hneăng hôp kăn teăng mâ lâp tơnêi têa roh má XIV dêi Đảng Kŏng san Việt Nam tơdrêng amê mơnhên tơdroăng loi tơngah kal kí trâu hơngế ƀă tơkêa troăng pêi cheăng ton xŏn pơla péa Đảng, péa Tơnêi têa ƀă kuăn pơlê péa tơnêi têa tung la ngiâ.