VOV4.Xơ Đăng - Hâi kố, lơ 16/2, 51 to kong pơlê, pơlê kong kơdrâm pơxiâm po tơdroăng ki leh pơcháu, tơdah xo lêng tung lâp tơnêi têa, hơnăm 2022 ƀă tơdroăng ki rĕng, tơdrêng, tơniăn, pêi pro kơtăng tơdroăng pơkâ hbrâ mơdât pơreăng. Maluâ hnoăng cheăng rah xo ƀă krếo kuăn pơlê lăm pro lêng po tung pơla pơreăng COVID-19 tâ tú ôh tá tơniăn, la mâu kong pơlê tung lâp tơnêi têa hiăng pêi klêi tâi tâng tơdroăng ki rah xo ƀă krếo kuăn pơlê pro lêng hơnăm 2022 ƀă tơdroăng ki rơkê plĕng, ki hên rơtăm ki châ rah xo lăm pro lêng ivá châ tiô tơdroăng pơkâ túa má 1, má 2.

Vâ rak tơniăn rơkê tung rah xo pro lêng, Khu pơkuâ ngăn lêng ối tung Khu xiâm tí tăng ‘nâi plĕng tơdroăng cheăng lêng Việt Nam hiăng pêi pro tro hnoăng cheăng tí tăng, pơkâ mơ’no mâu kơ koan, tíu pêi cheăng, kong pơlê ‘nâi nhên tơdroăng, tơbleăng tơdâng tơ’mô mâu troăng hơlâ, rơkê tung pơkuâ, khŏm mơ-eăm pôi tá ăm pơreăng tro tơdjâk troh ki rơkê tung tơdroăng rah xo. Kơjo kum rah xo mâu rơtăm ai ivá rơdêi tro. Tiô pơkâ, hnoăng cheăng pơcháu lêng kô po sap ing hâi kố troh tâi hâi lơ 20/2, pêi klâi tâi tâng rôh pơcháu lêng tung hơnăm kố.

Katarina Nga tơplôu ƀă tơbleăng