VOV4.Xơ Đăng - Hâi lơ 25/2, Khu pơkuâ ngăn Mố đô̆i Gâk tơkăng kong, kong pơlê Dak Lak tơrŭm ƀă tơring Ea Súp tơkŭm po Hâi mơdĭng mố đô̆i gak tơkăng kong tâi tâng kuăn pơlê hơnăm 2022 a cheăm tơkăng kong Ia Rvê. Kong pơlê Dak Lak ai troăng tơkăng kong xŏn 73km tơkoh ƀă kong pơlê Mondulkiri, kong têa Kul. Kơpong tíu tơkăng kong dêi kong pơlê Dak Lak mê cho 4 to cheăm ƀă 51 to thôn, pơlê ối tung 2 tơring Ƀuôn Đôn prế Ea Súp, cho tíu rêh ối dêi lối 22 rơpâu ngế kuăn pơlê ối 26 hdroâng kuăn ngo.

Kăn pơkuâ tơring Ea Súp hbru tơmeăm ăm mâu đông mố đô̆i gâk tơkăng

Mâu hơnăm hdrối nah, khu râ Đảng, khu kăn pơkuâ mâu tơring, cheăm hiăng tơrŭm krá tơniăn ƀă Khu pơkuâ ngăn Mố đô̆i gâk tơkăng kong rak vế krá tơniăn hnoăng pơkuâ tơnêi tơníu, gâk kring tíu tơkăng kong tơnêi têa, rak vế gâk kring tơniăn tung pơlê, cheăm. Ki nhên, a mâu cheăm tơkăng kong hiăng ai 26 khu pú hên, lối 480 rơpŏng, lối 1.600 ngế chêh inâi veăng rak ngăn troăng tơkăng kong, tơneăn tâp hdró tíu tơkăng kong. Pakĭng mê, kuăn pơlê a 51 to thôn, pơlê tíu tơkăng kong kĭ tơhrâ veăng tơplâ hbrâ mơdât mâu ngế ki pro xôi tung pơlê pơla.

Katarina Nga tơplôu ƀă tơbleăng