Tâi tâng 10 tơring, pơlê kong kơdrâm dêi kong pơlê Kon Tum tơkŭm po leh pơcháu lêng tung kơxo hâi lơ 13/2. Tung kơxô̆ ki mê ai 980 ngế rơtăm dêi kong pơlê Kon Tum lăm pro lêng kring vế tơnêi têa ai 800 ngế lăm pro lêng mot cheăng a mâu đông lêng ƀă lối 180 ngế mot cheăng tung khu Kŏng an. 

Tung mê, mâu lêng kuăn ngo lối 80%. Xuân tung kơxo hâi lơ 13/2, lối 2.800 ngế lêng a mâu cheăm, tơring dêi kong pơlê Gia Lai hiăng lăm pro lêng; tung mê ai 2.406 ngế lăm pro lêng mố đô̆i, 469 ngế pro lêng kŏng an. Mâu lêng ki nếo kô pêi cheăng a mâu đông mê cho: Kuân khu 5, Kuân đoân 34, a Khu xiâm pơkuâ ngăn lêng gak tơkăng kong dêi kong pơlê Gia Lai, Khu xiâm pơkuâ ngăn lêng kong pơlê Gia Lai, Sư đoân Lêng tơbai 372 (dêi Khu lêng pĕng kơnŏng - lêng tơbai), Kŏng an kong pơlê Gia Lai.

-Rơtế ƀă chât rơpâu ngế droh rơtăm a hên kong pơlê, pơlê kong kơdrâm tung lâp tơnêi têa, kơxo lơ 13/2, lối 3.000 droh rơtăm ki kơhnâ rơkê a Dak Lak hiăng lăm pro mô đô̆i. A tíu pơcháu – tơdah mô đô̆i a pơlê kong kơdrâm Ƀuôn Ma Thuột, ai 359 ngế rơtăm ki kơhnâ rơkê mot pro mô đô̆i. Chêh đơn pâ mot pêi hnoăng cheăng pro mô đô̆i roh kố, mô đô̆i nếo Y Đam Sam Niê, hdroâng kuăn ngo Rơđế, a bêng Ea Tam, pơlê kong kơdrâm Ƀuôn Ma Thuột tối: "ngoh thế mơ-eăm tơkâ hluâ mâu tơdroăng pá puât tung mô đô̆i, pơtâp lĕm vâ gâk kring pơlê xiâm, tơnêi têa’’.

Rơtế ƀă pơlê kong kơdrâm Ƀuôn Ma Thuột, leh pơcháu – tơdah  mô đô̆i châ tơkŭm po kân krip tơdrêng a 14 tơring, pơlê kong krâm a kong pơlê Dak Lak. Lâp kong pơlê ai 3.036 ngế rơtăm mot pro mô đô̆i roh kố, tung mê ai lối 160 ngế mơgêi đăi hok, kao đăng, trung kâp; hên ngế cho đảng viên.

-Rôh kố, kong pơlê Dak Nông ai lối 1 rơpâu 158 ngế rơtăm lăm pro lêng. Tung mê ai vâ chê 5% ngế rơtăm hriâm troh kao đẳng ƀă đăi hok. Mâu rơtăm kơhnâ rơkê dêi kong pơlê Dak Nông mot pro lêng rôh kố lăm pêi cheăng a mâu đông lêng mê cho a Lưh đoân 234 - Kuân đoân 34; Sư đoân 2 - Kuân khu 5; Trung đoân Bô̆ binh 994 – Khu xiâm pơkuâ ngăn lêng kong pơlê Dak Nông; Khu xiâm pơkuâ ngăn Mố đô̆i gak tơkăng kong Dak Nông ƀă Kŏng an kong pơlê Dak Nông.

Xuân tung kơxo hâi lơ 13/2, ai lối 1/200 ngế rơtăm dêi kong pơlê Lâm Đồng hiăng lăm pro lêng, tung mê ai 535 ngế lêng kuăn ngo. Tung kơxô̆ ki mê ai 23 ngế lêng cho đảng viên. Mâu rơtăm ki mê lăm pro lêng pêi hnoăng cheăng a mâu tối xiâm pơkuâ ngăn lêng ƀă Kuân khu 7.