VOV4.Xơ Đăng - Tơdroăng ing Ƀơrô Kuô̆k hô̆i tối ăm ‘nâi, tiô tối hdrối Tơdroăng pêi cheăng, roh hôp má 7 dêi Vi ƀan pơkuâ Kuô̆k hô̆i kô tơkŭm po sap hâi lơ 18 – 19/1/2022. A roh hôp kố, ‘na tơdroăng mơjiâng luât, Vi ƀan pơkuâ Kuô̆k hô̆i kô séa ngăn, tối ‘na: Tơdroăng tiâ mơnhên, tơdah rơkong tơpui tối, ‘mâi rơnêu luât tơ’noăng, kheăn kơdeăn (‘mâi rơnêu); pơkâ tơ’nôm tơdroăng tơkêa Pơkâ dêi Kuô̆k hô̆i mơnúa troăng pêi tơkŭm po pêi cheăng, hnê mơhno troăng pêi cheăng, hnê cheăng pêi ăm mâu ngế xôi ki ôh tá kroăng tung hngêi phak tung tơdroăng mơjiâng luât, luât hơnăm 2022; séa ngăn, pơkâ tơdroăng pêi pro hmân ếo tơleăng dêi Khu tơleăng tơdroăng xôi kuăn pơlê.

Xuân a roh hôp kố, Vi ƀan pơkuâ Kuô̆k hô̆i kô séa ngăn tơbleăng tơdroăng kuăn pơlê pói vâ khế 12/2021 dêi Kuô̆k hô̆i; Tơdroăng tơkêa bro rah tơtro khu pêi cheăng tung dế ƀă ƀiên chê̆ dêi Ƀơrô Kuô̆k hô̆i; tơpui ‘na tơdroăng mơgêi hneăng hôp hbrâ hdrối roh má môi, Kuô̆k hô̆i hneăng má XV.

A Sa Ly tơplôu ƀă tơbleăng