VOV4.Xơ Đăng - Khu pơkuâ ngăn Đảng pơlê kong kân Hải Phòng nếo pơkâ tơdroăng ‘na pơhlêh Tíu xiâm pêi pro tơdroăng kal kí – Tíu chêh pro hlá mơéa pơlê kong kân ngi peăng kơnhŏng Sông Cấm. Ki xiâm cho mơjiâng tíu pêi cheăng ăm mâu kơ koan pơkuâ tơdroăng kal kí, chêh pro hlá mơéa dêi pơlê kong kân tiô troăng ki tơkŭm, tơdrăng, rơkê, pro tơ’lêi ƀă kơdĭng kơxô̆ liăn ‘no hrê ăm kuăn pơlê, khu mơdró kâ troh chêh pro hlá mơéa, pơkâ tơleăng tơdroăng cheăng.

Hải Phòng pơhlêh Tíu xiâm xiâm pơkuâ tơdroăng kal kí – Tíu chêh pro hlá mơéa ngi peăng kơnhŏng Sông Cấm.

Tiô tối hdrối troh hneăng má 1 hơnăm 2025 kô klêi tơdroăng ki pơhlêh tíu pêi cheăng dêi mâu tíu pêi cheăng vêh a Tíu xiâm pơkuâ tơdroăng kal kí – Tíu chêh pro hlá mơéa nếo. Tíu pêi cheăng kố châ kơchuâ chêh ƀă mơjiâng pro tiô tơdroăng ki tơkŭm môi tuăn, pro lĕm ‘na khôi túa, ki lĕm ƀă tiô khôi hmâ dêi pơlê kong kân; veăng kum mơnhông kơphô̆ Hải Phòng tơxâng ƀă ki ai hlâu, tíu pêi cheăng ƀă ki pơxúa, pêi pro troh mâu tơdroăng pơkâ kơphô̆ túa ki tơviah, kơphô̆ ki rơkê plĕng, kơphô̆ ngiât.

Katarina Nga tơplôu ƀă tơbleăng