VOV4.Xơ Đăng - Hâi lơ 16/1 la ngiâ, a Hok viê̆n kan sát Nhân yân, Tơdroăng pleăng mơheăm hâi tĭng roh má 14 kô pơxiâm po. Tơdroăng hơnăm kố châ tơdah tơdroăng tơmâng tŏng kum dêi mâu khu xiâm, khu cheăng, kơvâ cheăng, ki rơhêng vâ tối cho tơdroăng ki veăng dêi lối 40 kong pơlê, pơlê kong kơdrâm, tiô tối hdrối tơdah sap ing 45 rơpâu troh 50 rơpâu CC mơheăm. Mơhé tá hâi po thế păng ‘nâng, laga sap khế 11 hơnăm nah troh nôkố, mâu tíu pleăng mơheăm dêi Hâi tĭng pleăng mơheăm a 15 kong pơlê hiăng tơdah vâ chê 6 rơpâu tơdrong mơheăm, tơxâng tơdroăng kal vâ mơ-eăm ăm thâ pơlât ƀă pơlât tung pơla hdrối, tung ƀă kơ’nâi Têt Lo hơnăm nếo Nhâm Dần 2022.

Hôp khu chêh hlá tơbeăng tơbleăng tơdroăng hâi tĭng pleăng mơheăm hơnăm 2022

Tơdroăng vâ pơtroh ‘’Pleăng mơheăm tŏng kum mơngế - Tơdroăng rêh dêi Pú ƀă Á’’ đi đo tung plâ lối 1 chât hơnăm sap ing hâi tâi tâng kuăn pơlê pleăng mơheăm châ hlá tơbeăng Tiền Phong pơxiâm po hiăng chiâng rơkong mơhnhôk ó rơdêi rêm roh hơnăm nếo vâ mơhnhôk tơdroăng tơmâng hên kơ koan, tíu cheăng ƀă kơdrâm kuăn pơlê ối tung hên hơnăm, kơpong, hdroâng mơngế, kơvâ cheăng rơtế veăng pleăng mơheăm.

A Sa Ly tơplôu ƀă tơbleăng