VOV4.Xơ Đăng - Đảng pin pơxiâm ai mâ a rơnó Hơngui, cho rơnó Hơngui dêi tơnêi têa ƀă hdroâng mơngế ƀă ai hên tơdroăng ki hơniâp ro ƀă tơdroăng tơmiât vâ. 92 hơnăm rơnó Hơngui ai Đảng – tíu cheăng tơnêi têa rế hía rế châ tối nhên ôh ti xê to tung kơpong mê ƀă tung lâp plâi tơnêi. Tơbâ Hâi mơjiâng Đảng cho môi hâi tơdroăng ki ton nah mot tung plâi nuih dêi rơtuh ngế Việt Nam rêm rơnó Hơngui troh.

Tơdroăng 92 hơnăm rơtế ƀă hdroâng kuăn ngo, Đảng Kŏng san Việt Nam cho môi tiah hơlŏng eăng mơhno troăng, ăm tơnêi têa Việt Nam pin sap ing ƀlêi trâng ki kố troh ƀlêi trâng ki ê. Tơdroăng ki mê, ivá ki mê mơhno tối tung mâu rôh tơdroăng ki ton nah hiăng chêh, tung mâu tơdroăng ki hơ’lêh rêm hâi dêi tơnêi têa, tung rêm toăng hngêi, tung lâp lu pơlê cheăm achê hngế.

*** Cheăm Nâm Nung, tơring Krông Nô, kong pơlê Dak Lak cho kơpong đông kăch măng tung rơxông tơplâ xâ Pơhlăng ƀă plâ xâ Mih tŏng kum tơnêi têi têa. Mơnhông khôi túa lĕm tro khên tơnôu, Đảng ƀô̆, khu râ kăn pơkuâ ƀă kuăn pơlê cheăm Nâm Nung đi đo mơ-eăm tơkâ hluâ pá puât, mơ-eăm xông tơtêk ó rơdêi, mơjiâng pơlê xiâm rế hía rế mơnhông mơdêk. Lâp cheăm nôkố ai lối 1.900 rơpŏng, ƀă dâng 8 rơpâu pơ’leăng mâ mơngế, (tung mê ai dâng 2 rơpâu mơngế M’Nông). Châ tơmâng mơ’no liăn ngân dêi Đảng ƀă Tơnêi têa, tơdroăng rêh ối dêi kuăn pơlê đi đo xông tơtêk, hơnăm kố pêi lo liăn rêm pơ’leăng mâ mơngế a kơlo 40 rơtuh liăn. Pôa Y Sram ối a ƀon R’Cập, cheăm Nâm Nung tối:

“Mơnê Đảng, tơnêi têa hiăng pro tơ’lêi hlâu ăm mơngế M’nông tối krê ƀă kuăn pơlê tối tơdjuôm. Nôkố troăng kân, on tơhrik, hngêi trung, hngêi pơkeăng cheăm hiăng tŭm. Tâi tâng kuăn ‘nĕng ngin pơrá troh hngêi trung troh lâm, mâu rơpŏng ai kuăn ‘nĕng tro hơnăm hriâm châ lăm hriâm tŭm. Rơxông hdrối nah ôh tá ai hngêi trung, ai lâm ối pá puât, ki má lối cho rơxông tơplâ, kố cho kơpong đông kăch măng, kuăn pơlê kơtiê pá puât. Laga nôkố hiăng pơ’lêh hên, tơdroăng rêh ối dêi kuăn pơlê mơnhông mơdêk mơ-eăm ôh tá môi tiah hdrối nah xếo’’.

*** Kong pơlê Dak Lak nôkố ai 4 tơdroăng ki tiô khôp kân cho khôp Pa Xeăng, khôp Tin lành, khôp Phop ƀă khôp Cao Đài, tâi tâng ai lối 600 rơpâu ngế tiô khôp, châ 32% pơ’leăng mâ mơngế. Tung mâu hơnăm hdrối nah, ƀă tơdroăng ki pơkuâ dêi Đảng, vâi krâ nhŏng ki tiô khôp pơrá kơhnâ mơnhông mơdêk cheăng kâ, mơjiâng pơlê, cheăm, tơdroăng rêh ối lĕm ‘na châ tro ‘na mơhúa. Ƀok Tin Lành Y Ky Êban, Pơkuâ Chi hô̆i Tin Lành Ea Tul, cheăm Ea Tul, tơring Čư̆ Mgar, kong pơlê Dak Lak, tối: Tơdroăng loi tơngah dêi vâi krâ nhŏng o gá kân khât, prôk tro tiô tơdroăng khôp, loi tơngah tung tơdroăng pơkâ dêi Đảng. Hneăng hôp lâp tơnêi têa rôh má 13 dêi Đảng po tơniăn lĕm tung hơnăm hdrối nah xuân cho tơdroăng ki mơhno tối tơdroăng ki loi tơngah dêi rêm ngế kuăn pơlê ‘na mâu tơdroăng pơkâ tơtro, ăm tơnêi têa mơnhông tung rêm kơvâ cheăng. Xuân tiô Ƀok Tin Lành Y Ky Êban, tung rôh hbrâ mơdât pơreăng COVID-19, hnoăng cheăng pơkuâ dêi Đảng ối mơhno tối a mâu tơdroăng ki mơ-eăm vâ châ pâk vaccine ăm tâi tâng kuăn pơlê.

“Tung hơnăm hdrối mê hía nah Đảng ƀă tơnêi têa tơmâng ngăn, pro tơ’lêi hlâu vâ vâi krâ nhŏng o châ pâk vaccine vâ hluăn ing pơreăng COVID-19. Loi tơngah tung hơnăm nếo kô ôh tá ai pơreăng, kơklêa kơtiê ƀă mâu tơdroăng ki ‘mâi rơnêu ôh ti trâm xếo ki xâu xía ƀă kuăn pơlê, kuăn pơlê môi hiâm mơno mơnhông mơdêk cheăng kâ, mơdêk tơrŭm tâi tâng hdroâng mơngế Việt Nam môi tiah nhŏng o môi hngêi”.

*** Đảng viên Lơ Mu Ha Dzô, ối a thôn 6, cheăm Dà Sar, tơring Lạc Dương, kong pơlê Lâm Đồng mơnhên, kơnôm tơmâng pơkuâ dêi Đảng, khu râ kăn pơkuâ cheăm, pơreăng COVID-19 hiăng rĕng châ mơdât, tơnêi têa pơ’lêh chiâng tơniăn tiah hmâ nếo, mơjiâng tơdroăng ki loi tơngah tung kuăn pơlê:

K’ho: ‘’Đảng ƀă Tơnêi têa tơmâng troh kuăn pơlê hên, mơ’no liăn tŭm tơdroăng xua mê tơdroăng rêh ối dêi kuăn pơlê hiăng châ mơdêk tâng pơchông ƀă hdrối nah. Drêng pơreăng COVID-19 xông tâ tú, mâu khu râ kăn pơkuâ hiăng teăm tơdrêng pơtâng tối ƀă hnê mơhno kuăn pơlê mơdêk hlê plĕng, veăng hên tung tơdroăng pêi pro mâu troăng hbrâ mơdât pơreăng COVID-19 ƀă djâ châ tơƀrê hên. Nôkố pơlê xuân ối rak cho kơpong ngiât tơniăn, tơdroăng rêh ối cheăng kâ dêi kuăn pơlê mê tơniăn ƀă mơnhông mơdêk xua kơphế châ kơnâ yă. Hơnăm nếo xuân ai tơ’nôm hên tơdroăng phiu ro, hơniâp lĕm’’.

*** Pôa Ksor Jar, kăn phŏ pơkuâ hnê ngăn chi ƀô̆ pơlê Châm Prông, cheăm Ia Băng, tơring Đăk Đoa, kong pơlê Gia Lai tối nhên: Hơnăm 2021 kố nah, pơreăng COVID-19 hiăng pro hơ’lêh mâu tơdroăng rêh ối dêi vâi krâ nhŏng o. Ƀă hnoăng cheăng djâ troăng ahdrối dêi ngế đảng viên, pôa Ksor Jar hmâ hnê tối ăm vâi krâ nhŏng o hlê ƀă loi tơngah tung tơdroăng ki hnê thế dêi Đảng, Tơnêi têa tung hbrâ, mơdât pơreăng tiô kơ rêm hneăng:

“Hơnăm 2021 kố nah, Đảng ƀă Tơnêi têa pin hnê mơhno kơtăng khât tung tơdroăng ki vê hdró kơpong, mơdât pơreăng. Troh khế 9/2021, kuăn pơlê ngin châ pâk 2 hdroh  vaccine, Đảng ƀă Tơnêi têa mê pơ’lêh túa pơkâ rêh ối tơdjuôm, hmâ tơniăn, rơkê, hbrâ mơdât tơƀrê ƀă pơreăng. Tơdroăng kố kum ngin rế châ tơniăn tâ, rế pơtối mơnhông cheăng kâ tung rơpŏng hngêi. Nôkố, cho đảng viên, á hmâ mơhnhôk kuăn pơlê pêi pro kơtăng tiô pơkâ 5K ƀă loi tơngah tiô tơdroăng hnê mơhno dêi Đảng ƀă Tơnêi têa”.

Loi tơngah tung tơdroăng pơkuâ dêi Đảng, tơdroăng rêh ối hơ’lêh a Tây Nguyên xuân rế hía rế bâ eăng, xua hiâm mơno, tơdroăng ki rơhêng vâ mơ-eăm dêi rêm ngế kuăn pơlê, rêm ngế đảng viên

*** Tung tơdroăng mơjiâng thôn pơlê nếo, troăng pơkâ Đảng tiô hiâm mơno kuăn pơlê rế thăm mơhno nhên. Kuăn pơlê a pơlê xiâm ki lâi xuân hbrâ vâ pleăng tơnêi, veăng hâi pêi cheăng mơjiâng pro troăng kân, mơjiâng hngêi trung hriâm, tơmeăm ki kal xúa rêm hâi dêi pơlê. Mê ôh tá xê to tơdroăng khŏm mơ-eăm, hiâm mơno vâ mơ-eăm păng ‘nâng mê mơhno nhên tơdroăng loi tơngah ƀă Đảng, khu râ kăn pơkuâ cheăm. Pôa Điểu Khuyên – Kăn pơkuâ pơlê Bu Bir, cheăm Quảng Tín, tơring Dak Rlâp, kong pơlê Dak Nông tối tơdroăng ki phiu ro dêi thôn pơlê nếo:

‘’Sap ing ai troăng kân, kuăn pơlê pâ mơnê kơ Đảng, khu râ kăn pơkuâ hiăng pro tơ’lêi hlâu mơjiâng troăng prôk lăm tơ’lêi hlâu. Ing mê, tơdroăng prôk lăm tung pơlê ƀă pơto phon rơvât, tơmeăm pêi lo ing chiâk deăng dêi kuăn pơlê ing chiâk deăng pơto vêh a hngêi xuân tơ’lêi. Mê cho kơnôm ai tơdroăng 135 pro 400 met troăng kân ƀă kuăn pơlê veăng tơlo tơ’nôm pro tâi tâng troăng tung pơlê vâ chê 1km; ai 20 rơpŏng veăng rơtế tơnêi têa. Troăng kân kố xuân ai tơdroăng veăng kum ai mâu rơpŏng pleăng tơnêi, kếo loăng plâi hôt, loăng kơphế vâ mơjiâng pro troăng kân nếo tơ’lêi hlâu prôk lăm, kuăn pơlê xuân ‘nâi hnoăng ki pơxúa ai troăng vâ mơnhông mơdêk cheăng kâ’’.

*** A kong pơlê Kon Tum, mâu hơnăm hdrối ôh tá iâ ngế ki kro mơdŏng cho hdroâng kuăn ngo sap ing pêt loăng pơkeăng ki kơnía. A Chung ối a pơlê Đăk Yơn, cheăm Măng Ri, tơring Tu Mrông, kong pơlê Kon Tum cho môi tơdroăng ki mơnhên tối. Ƀă dâng 5 rơpâu xiâm sâm Ngọc Linh, yă tê sap ing 120 troh 230 rơtuh liăn môi kg pôm tá hlá môi tiah nôkố, pôa A Chung hiăng chiâng ngế ki kro mơdrŏng kơnôm ing sâm Ngọc Linh. Pôa ăm ‘nâi ôh ti xê krê to rơpŏng pôa ai liăn ‘măn, kế kâ mê lối 100 rơpŏng kuăn pơlê a pơlê Đăk Yơn pơrá ai tơdroăng rêh ối chía niân. Ối a kơpong ki pro kăch măng, ai tơdroăng rêh ối phâi tơtô hơniâp ro, tung tơdroăng ki hơniâp ro hơnăm nếo A Chung phoih ƀriê, Đảng hiăng djâ ăm kuăn pơlê mâu hơngui phâi tơtô:

“Kơnôm Đảng, Tơnêi têa tơmâng ngăn troh kuăn pơlê mê ki hên vâi krâ nhŏng o akố châ pêt sâm Ngọc Linh vâ mơnhông mơdêk cheăng kâ. Đảng, Tơnêi têa ối tơmâng ngăn tŏng kum vâi krâ nhŏng o ‘na pul on ki ‘no bâ eăng a troăng, hên rơpŏng hiăng mơ-eăm pro kro mơdrŏng, hên ngế ai phôn râng kŏng ki rơkê, hngêi ki lâi xuân hiăng ai măng wifi, tơvi vâ ngăn tơmâng mâu tơdroăng ki kal tung tơnêi têa ƀă kong têa ê. Vâi krâ nhŏng o pơlê Đăk Yơn phiu ro loi tơngah tung tơdroăng pơkuâ dêi Đảng. Hơnăm nếo, khu kăn pơkuâ xuân tơmâng ngăn, tŏng kum mâu rơpŏng kơtiê, rơpŏng xơpá a cheăm Măng Ri kố”.

*** Cho môi ngế đảng viên hơnăm ối nếo, ngoh Đinh Văn Phới, kăn ƀô̆ Ƀơrô hdroâng kuăn ngo, tơring Đăk Pơ, kong pơlê Gia Lai tâ phiu ro păng ‘nâng drêng ối pá kơdâm hlá cơ Đảng ƀă pơchuat rơkong tơkêa 4 hơnăm hdrối. Tơdrêng amê, Đinh Văn Phới xuân tâ hlo dêi tơná ai hnoăng veăng mơ’no ivá hơnăm ối nếo tơná veăng hên tâ mâu tơdroăng tŏng kum rêh ối pơlê pơla, pleăng hnoăng cheăng troh mâu kơpong hơngế, hơngo. Kơnôm troăng hơlâ dêi Đảng ƀă Tơnêi têa, tơdroăng rêh ối dêi kuăn pơlê, vâi krâ nhŏng o a mâu pơlê rế hía rế phâi hơtô, tơdroăng cheăng kâ tơtêk, kum hên tung tơdroăng mơnhông mơdêk dêi pơlê pơla. Đảng viên Đinh Văn Phới tối:

TĐ Bana: ‘’Vâi krâ kuăn pơlê pin akố pêi pro tro troăng hơlâ dêi Đảng ƀă Tơnêi têa, mơ-eăm pêi kâ mơnhông mơdêk cheăng kâ rơpŏng. Cho môi đảng viên hơnăm ối nếo, tung pơla kố nah á xuân hiăng, dế ƀă pơtối mơ-eăm pơtâng tối mơhnhôk kuăn pơlê pêi pro tơtro troăng hơlâ dêi Đảng, Luât dêi Tơnêi têa, mơhnhôk kuăn pơlê pêi pro tro tơdroăng hbrâ mơdât pơreăng COVID-19 ƀă kuăn pơlê hiăng pêi pro tro’’.

*** Tơkâ luâ mâu tơdroăng xơpá dêi hơnăm 2021 xua pơreăng COVID-19 pro, ngoh Myet, a pơlê Tiêng, cheăm Tân Sơn, pơlê kong kơdrâm Plei Ku, kong pơlê Gia Lai hbrâ rơnáu mot tung hneăng ki nếo hmâ tơniăn, rơkê ƀă pơreăng vâ rế hbrâ mơdât pơreăng ƀă rế mơnhông mơdêk cheăng kâ. Ngoh Myet tối nhên, tung hơnăm nếo 2022, ngoh ƀă kuăn pơlê tung pơlê kô pêi pro kơtăng tơdroăng pơkâ thế dêi kơvâ ngăn pơkeăng, rak vế tơniăn ivá ƀă mơnhông cheăng kâ dêi rơpŏng hngêi:

“Ngin đi đo rơhêng vâ rơpŏng hngêi mơnhông mơdêk tâ vâ pro ai pơxúa tơdroăng ki hơniâp ro tung rêh ối. Hơnăm 2021 ai pơreăng kân COVID-19 mê hiăng pro ăm pơlê, cheăm xâu, tô tuăn, trâm hên xơpá. Rơhêng vâ sap ing kố troh xo ah hmôi pin hơ’lêh nếo. Pin athế mơ-eăm pêi cheăng. Rơtế ƀă dêi rơpó pêi pro tro tiô tơdroăng hnê mơhno dêi râ kơpêng, vâ rơtế ƀă dêi rơpó rêh ối tro tâ. Rơkâu ăm hơnăm nếo vâi krâ nhŏng o pêi cheăng kâ châ tơƀrê, cheăng kâ mơnhông,’nâi rak vế ăm dêi tơná, vâ hơnăm nếo kố pơreăng kô châ hbrâ mơdât, pơlê cheăm vêh chiâng tiah hmâ môi tiah hdrối nah”.

Tơnêi têa Việt Nam ing pơkuâ hnê mơhno dêi Đảng, pro chiâng Kăch măng Khế Tơheăm châ tơƀrê, mơjiâng tơnêi têa Việt Nam Yân chuh Kŏng hoa, môi tuăn tơnêi têa ƀă châ ƀlêi trâng hên tung tơdroăng pơ’lêh nếo. Ƀă hên hĭn hnoăng kân kĭn mê, Đảng pin cho rơnó Hơngui dêi tơnêi têa, dêi kuăn mơngế Việt Nam. Môi rơnó Hơngui nếo pơtối troh! Rêm ngế Việt Nam lâp lu tung tơnêi têa pơtối pâ vế ‘na 92 hơnăm mơjiâng  Đảng Kŏng san Việt Nam ƀă Pôa Hồ nhuô̆m pâ, rêm ngế kăn ƀô̆, đảng viên, rêm ngế kuăn pơlê krá tơniăn loi tơngah kơteăng troh hơnăm 2022 hên tơdroăng pói tơngah châ tơƀrê.

A Sa Ly - Katarina Nga tơplôu ƀă tơbleăng