Măng tĭng apoăng vêh pêi cheăng ƀă hngêi trung lâm dêi cô yăo hơnăm ối nếo Lê Thị Hồng Anh, 25 hơnăm, a cheăm Čư Êbuôr, pơlê kong kơdrâm Ƀuôn Ma Thuột, tâ tung hiâm mơno pá vâ chiâng tối. Râng hlá mơ-éa krếo mot pro mô đô̆i a kŏng, Hồng Anh tâ khéa mơjo há laga tơdroăng sôk ro hên tâ xua pói vâ chiâng mô đô̆i hiăng vâ chê troh. Ƀă tiô Hồng Anh, chiâng ngế mô đô̆i cho troăng nâ vâ pơtó khôi túa rơpŏng, môi tơdroăng pói vâ sap ing ối kŭn:

‘’Jâ á cho Nôu Việt Nam Khên tơnôu, mâu nhŏng o dêi jâ ƀă kuăn jâ cho mô đô̆i hlâ tung tơplâ xâ nah, xua mê á hâk vâ ‘nâng mơngiơk ngiât ếo mô đô̆i. Apoăng, nôu pâ á tô tuăn xua á cho kuăn kơdrâi, lo a tíu pơtâp lêng cho tơbrê tơbrêh, kong tô kong mêi. Laga, hlo á khŏm vâ, rơpŏng hiăng mơhnhôk ƀă môi tuăn. Xua mê, á khŏm mơ-eăm pêi pro tâi tâng ƀă rơxông ối nếo ƀă chêh đơn pâ pleăng hnoăng cheăng lăm pro mô đô̆i’’.

Ƀă đảng viên Phương Bắc Ƀkrông (20 hơnăm, hdroâng kuăn ngo Rơđế, a ƀuôn Čuăh, cheăm Ea Na, tơring Krông Ana) xuân pơtê pơtân tơdroăng hriâm a hngêi trung kao đăng, chêh đơn pâ mot pro mô đô̆i. Phương Bắc tơmiât tơdroăng rêh ối pêi cheăng tung mô đô̆i cho tíu ki má môi vâ rơxông ối nếo vâi hdrêng pơtâp, tá ivá ƀă tơdroăng rêh ối, tuăn ngôa rơkê ƀă tơdroăng ki khŏm mơ-eăm:

‘’Mot pro mô đô̆i, á kô mơ-eăm pơtâp lĕm tro mâu ƀai hnê ‘na tơchok vâ mơdêk ivá. Á xuân kô tơkŭm hriâm mâu tơdroăng ‘na kal kí ăm i lĕm tro vâ plĕng nhên tâ ‘na tơdroăng roh nah hdroâng mơngế pin, ing mê mơdêk tơdroăng khên tơnôu kal kí ƀă mơ-eăm chiâng ngế lêng mô đô̆i Pôa Hồ’’.

Veăng tung hnoăng cheăng pro mô đô̆i a hơnăm 1990, pôa Y Tách Bkrông, pâ dêi ngoh Phương Bắc Bkrông, môi tuăn, mơhnhôk kuăn veăng pro mô đô̆i roh kố vâ kuăn rế pleăng hnoăng cheăng, rế pơtâp dêi châ tung tíu rêh ối pêi cheăng khu lêng, mơhé thế pơtê pơtân tơdroăng hriâm tâp.

‘’Á pêi tơdroăng ‘na troăng tơmiât ăm kuăn cháu hbrâ lo lăm pro mô đô̆i. Tíu pơtâp tung khu mô đô̆i cho kơtăng khât, pá puât, pơkâ thế hriâm tâp xêh, pơtâp vâ mơdêk châ chăn, hiâm mơno ƀă tơdroăng ki pêi cheăng kơtăng. Á muăn kal mơ-eăm tơkâ hluâ 3 khế pơtâp vâ chiâng ối tung khu Mô đô̆i kuăn pơlê Việt Nam, veăng gum pêi pro tơdroăng ki pói vâ ivá ối nếo gâk kring pơlê xiâm, tơnêi têa’’.

Hneăng rah mô đô̆i hơnăm kố, kong pơlê Dak Lak krếo khăm ivá 10.373 ngế vâi rơtăm. Tung mê, 2,553 ngế kuăn pơlê châ mot pro mô đô̆i, ai 3 ngế kơdrâi, 8 ngế đảng viên, 162 ngế hiăng mơgêi đăi hok, kao đăng lơ trung kâ̆p. Đăi tă Niê Ta, Kăn pơkuâ Khu xiâm pơkuâ Mô đô̆i kong pơlê – Phŏ Kăn hnê ngăn Hô̆i đong rah xo mô đô̆i kong pơlê Dak Lak tối ăm ‘nâi tơdroăng pơcháu – tơdah mô đô̆i hiăng châ mâu đông ƀă kong pơlê hbrâ inhên, hbrâ pêi pro a hâi lơ 13/2 la ngiâ. Đăi tă Niê Ta mơnhên, 100% vâi droh rơtăm mot pro mô đô̆i roh kố ai ivá lĕm, hlê plĕng nhên ‘na hnoăng cheăng dêi châ tơná:

‘’Hơnăm kố ai lối 500 droh rơtăm hơnăm ối nếo a kong pơlê vâ xêh chêh đơn mot pro mô đô̆i, hên tâ mâu hơnăm hdrối, kố cho tơdroăng ki sôk ro. Rơxông ối nếo nôkố hiăng hlê plĕng tâ tung tơdroăng hlê plĕng hnoăng cheăng ƀă tơdroăng ki thế pêi dêi châ ƀă hnoăng cheăng mơjiâng, gâk kring Tơnêi têa. Mâu vâi o pơrá hriâm rơkê, hbrâ pleăng tuăn ngôa rơkê, ivá vâ mơjiâng khu lêng ki khên tơnôu păng ‘nâng, tiô rơxông nếo’’.

Mâu droh rơtăm hơnăm ối nếo môi tiah Lê Thị Hồng Anh, Phương Bắc Bkrông lơ hên droh rơtăm hơnăm ối nếo ki ê a Dak Lak, mơhé tơdroăng phá dêi pó, laga pơrá tơdjuôm tơdroăng khŏm mơ-eăm vâ pơtối pêi tiô khôi vâi krâ nah kăch măng ƀă pleăng ivá hơnăm ối nếo ăm tơdroăng gâk kring Tơnêi têa. Vâi dế rêh tâi ivá tơná ƀă rơxông ối nếo ƀă troh lâp lu hiâm mơno pâ nhuô̆m tơnêi têa tung pơlê pơla.