Leh po kĭ tơkêa Hà Nội po tung pơla péa hâi 25 ƀă 26/10. Pơchuât tơbleăng dêi Khu hnê mơhno cheăng ăm ‘nâi, troh nôkố ai 93 khu râ kăn xiâm, ngế xiâm pơkuâ mâu kong têa rơtế ƀă lối 1 rơpâu ngế kăn, ngế chêh hlá tơbeăng kong têa ê tối kô veăng ai mâ. Khu xiâm ngăn Kŏng an ƀă Khu xiâm tơpui kâ hiăng tơrŭm krá tơniăn ƀă Kơ koan Khu lâp kong têa ‘na ma tŭi ƀă mâu ngế pro xôi vâ mơjiâng pro tơdroăng ƀă 8 tơdroăng pa gong rôh hôp khu râ kăn xiâm, 38 rôh hôp tơpui tơno, lối 20 kơbong mơđah tơbleăng um.

Mơgêi rôh pêi cheăng, Kăn xiâm hnê ngăn tơnêi têa tối nhên ki pơxúa dêi tơdroăng kố drêng Việt Nam rôh apoăng tơkŭm po leh kĭ tơkêa dêi Khu lâp kong têa ‘na plâ mơdât, mâu ngế xôi ing măng.