VOV4.Xơ Đăng - Drêng Hâi kơdrâi lâp plâi tơnêi lơ 8/3, kơxê lơ 4/3, troh pôu ƀă rơkâu Tíu xiâm ngăn vâi kơdrâi Việt Nam, pôa Trần Thanh Mẫn, ngế cheăng tung tíu xiâm kal kí, kăn xiâm phŏ hnê ngăn má môi Kuô̆k hô̆i pơkâ thế hbrâ rơnáu tro vâ tơkŭm po châ ƀlêi chiâng Hneăng hôp mâu kăn vâi kơdrâi lâp tơnêi têa rôh má 13 la ngiâ.

Teăng mâ Kăn pơkuâ Đảng, Tơnêi têa, Kuô̆k hô̆i, pôa Trần Thanh Mẫn pơtroh rơkong rơkâu tơniăn lĕm troh Khu ngăn vâi kơdrâi Việt Nam xuân môi tiah tâi tâng mâu vâi nâ, o kơdrâi tung lâp tơnêi têa đi đo rơdêi, hơniâp ro ƀă ƀlêi châng. Ƀă inâi “Tơdâng tơ’mô hâi kố xua môi hâi kơxo ah krá tơniăn” dêi hâi vâi kơdrâi lâp plâi tơnêi lơ 8/3 hơnăm kố, pôa Trần Thanh Mẫn tối nhên kăn pơkuâ Đảng, Tơnêi têa, Chin phuh, Kuô̆k hô̆i kô pơtối pro tơ’lêi hlâu vâ vâi kơdrâi kăn ƀô̆, kŏng nhân, kong chưk, vien chưk, đoân viên công đoàn pơtối mơdêk tâi ivá, mơhno tối ivá cheăng dêi tơná, loi tơngah dêi tơná, pêi châ hên tơdroăng ki rơkê, veăng kum hên tâ néo tung tơdroăng cheăng hơ’lêh nếo tơnêi têa tung la ngiâ.

Katarina Nga tơplôu ƀă tơbleăng