Lối chât ngế sinh viên ki pleăng dêi hnoăng tung kong pơlê ƀă kong pơlê ki ê, dế veăng pêi mâu tơdroăng cheăng tŏng gum rêh ối pơlê pơla a cheăm tơkăng kong Ea Rốk ƀă Ia Lốp, kong pơlê Dak Lak, tơdrêng amê, hlối pêi hên mâu tơmeăm, xoăng cheăng pêi ki pơxúa a kong pơlê. Khu ki 45 ngế sinh viên pleăng dêi hnoăng dêi Hngêi trung Đại học Nam Cần Thơ hiăng tơrŭm ƀă sinh viên, droh rơtăm kong pơlê pêi hên tơdroăng cheăng ai pơxúa, môi tiah: diâp mơ-éa hriâm ƀă tơmeăm xúa tung hriâm tâp ăm sinh viên râ má môi, pro tíu xah hêi ƀă tơkŭm po tơdroăng xah ro rơnó pơtê hriâm ăm vâi hdrêng, diâp loâ toi ăm mâu tíu hôp tơdjuôm.

Pakĭng mê, lối hrĭng to hlá cơ Tơnêi têa châ diâp ăm a kŏng kuăn pơlê, lối rơpâu tơdrong xup kơxŏng khăng châ pơtroh ăm mâu vâi o ƀă mâu ngế ki hiăng krâ ôh ti ai kơbố păn roăng. Xo tơmeăm ƀă kơtong, loăng chêh ăm dêi kuăn kơnốu hbrâ vâ mot hriâm lâm 4, jâ Huỳnh Thị Cẩm Tú, a thôn Dự, cheăm Ia Lốp, kong pơlê Dak Lak, ƀriê lo têa mâ:

“Akố cho kơpong hngế hngo mê châ xo mâu tơmeăm môi tiah kố gá ro khât, mâu vâi muăn tơxĭn xuân hâk, ro ƀă xuân ƀriê lo têa mâ há. Mơnê mâu sinh viên lo ing hngế troh akố diâp ăm mâu vâi muăn mâu tơmeăm ki ai pơxúa kố”.

Ôh ti xê pro pơxúa mâu tơmeăm liăn ngân, khu ki pleăng dêi hnoăng ối tơkŭm po hnê tối luât ‘na hbrâ mơdât pro pơlăm pơlối, ‘nêk mơ’nêa, pâk chik xúa trếo ma tŭi ƀă tê roê mơngế, mơdêk ki hlê plĕng ‘na tơdroăng ki rak ngăn xêh tơná ăm kuăn pơlê a tíu tơkăng kong. Tâi tâng kơnâ mâu tơdroăng pêi pro mê lối 300 rơtuh. Sinh viên Mai Huỳnh Đặng, ngế ki ối tung khu pleăng dêi hnoăng tối, môi pơla măng tĭng pleăng dêi hnoăng ôh tá ton, la hiăng ‘măn chôu tơdroăng ki ôh tá kâi piu ôh ti xê to ƀă kuăn pơlê kơpong tơkăng kong mê ối tá ƀă rêm ngế sinh viên.

“Luâ tâ mâu tơdroăng klâi ki á tơkôm ƀă hiăng hbrâ rơnáu sap ing hdrối mê. Xua á hiăng hlê tung pêi pro mâu tơdroăng ki pleăng dêi hnoăng a rơní pơtê hriâm a Tây Nguyên la rôh kố ai hên tơdroăng ƀriê ki nếo tâ. Klêi tơdroăng kố mê á ai tơ’nôm mâu tơdroăng ki rơkê plĕng nếo, ƀai hriâm nếo ăm mâu rôh pleăng hnoăng ki pơtối, gum á rơkê plĕng tâ ‘na mâu tơdroăng cheăng tŏng gum pơlê pơla”.

A cheăm Hòa Phú, kong pơlê Dak Lak, lối 500 ngế kăn ƀô̆, lêng Trung đoân 584 (Khu pơkuâ ngăn lêng kong pơlê Dak Lak) rơtế ƀă hên đoân viên droh rơtăm kong pơlê nếo lo lăm pleăng dêi hnoăng a rơnó pơtê hriâm 2025 tiô pơkâ dêi Khu pơkuâ ngăn lêng kong pơlê ƀă Vi ƀan Măt trâ̆n Tơnêi têa Việt Nam kong pơlê. Tung rôh ki pleăng dêi hnoăng ton 45 hâi, kăn ƀô̆, lêng ƀă đoân viên droh rơtăm mâu cheăm Hòa Phú, Ea Kiết ƀă bêng Tân Lập (kong pơlê Dak Lak) rơtế veăng ‘mêng pro troăng prôk tung thôn pơlê, pêt loăng ngiât, pro tơmeăm tơrŭm pơla khu lêng ƀă kuăn pơlê, hngêi ối ăm rơpŏng ki châ tơnêi têa gum, ‘mêng pro tơnêi tơníu ki mot tung thôn, cheăm – bêng, ƀă gum kuăn pơlê pơhlêh kơxô̆, chêh pro mâu mơ-éa tung pơla ‘mot tơkŭm.

Veăng pleăng dêi hnoăng a kơxo kố a cheăm Hòa Phú. Đăi ŭi Phan Thanh Tài, Tiêuh đoân 303 – Trung đoân 584 (Khu pơkuâ ngăn lêng kong pơlê Dak Lak) ăm ‘nâi, cheăng pleăng dêi hnoăng pơxiâm sap ing hâi kố troh hâi lơ 30/8, tiô tối hdrối kô ‘mêng 150 toăng hngêi ối ăm mâu rơpŏng ki châ tơnêi têa gum, ‘mêng lối 90 km troăng prôk tung thôn pơlê, pêt lối rơpâu xiâm loăng ngiâ a mâu cheăm ki nếo:

“Rôh má 1 hơnăm 2025, ngin mơhnhôk lối 100 ngế kăn ƀô̆, lêng vâ pêi pro mâu tơdroăng xoăng cheăng pêi a 2 to cheăm ƀă 1 to bêng, tơkŭm kui tah trâp a mâu tíu hdoăng têa, mơgrúa lĕm tíu pêi cheăng, gum mâu rơpŏng ki châ tơnêi têa gum ƀă hên tơdroăng ki kal pêi. Ing mê veăng gum pro tơdroăng tơrŭm pơla khu lêng ƀă kuăn pơlê, pro chiâng ivá rơdêi vâ ngin pêi klêi hnoăng cheăng rak vế tơniăn gâk kring, cheăng lêng”.

Rơtế veăng tung rôh pleăng hnoăng rôh kố, a cheăm Hòa Phú, kong pơlê Dak Lak, đoân viên, droh rơtăm cheăm xuân veăng pêi mâu tơdroăng môi tiah mơgrúa lĕm tơnêi tơníu ối, gum kuăn pơlê pơhlêh kơxô̆, hnê vâi chêh pro mơ-éa ing điê̆n tưh. Ngoh Lê Dương Bá Ước, phŏ kăn hnê ngăn Vi ƀan Măt trâ̆n Tơnêi têa Việt Nam cheăm Hòa Phú, pơkuâ cheăng Đoân dêi cheăm ăm ‘nâi: maluâ cheăm nếo ‘mot tơkŭm, tơdroăng cheăng hên, la mâu đoân viên, droh rơtăm đi đo pleăng dêi hnoăng, rơtế pêi ƀă mố đô̆i tung cheăng hnê mơhnhôk ƀă mơjiâng thôn pơlê nếo.

"Đoân cheăm tơrŭm ƀă Trung đoân 584 gum hâi pêi cheăng gum vâi krâ kuăn pơlê poê báu, krí kơphế ƀă krí tiu drêng mot tung rơnó. Pakĭng mê, ngin ối tơbleăng pro mâu tơmeăm, xoăng cheăng ăm droh rơtăm, ki hên cho túa pơkâ pêi kơthung tâ xok pôi tá xú ‘mêi a thôn 8, cheăm Hòa Khánh (hdrối nah)”.

Mâu tơdroăng cheăng pêi ki nhên, pơxúa tung rôh pleăng dêi hnoăng a rơnó pơtê hriâm 2025 a Dak Lak ôh ti xê mơhno hiâm mơno pôu râng, hiâm mơno kơhnâ dêi mâu hơnăm ối nếo mê ối veăng gum pro pơhlêh tơdroăng rêh ối kuăn pơlê kơpong tơkăng kong, kơpong hngế hngo. Ing mâu kơxuô tơmeăm ki kŭn, mâu tơmeăm pro tung pơlê pơla troh cheăng hnê mơhnhôk, tâi tâng hiăng tơdjâk tơdroăng ki rơkê plĕng, tơrŭm pơla sinh viên, lêng ƀă vâi krâ kuăn pơlê.