Kơxê lơ 15/12/2025, a Hà Nội, pôa Phạm Minh Chính, Ngế pro xiâm hnê ngăn tơnêi têa veăng ai mâ a Leh tơbâ 50 hơnăm mơjiâng Vi ƀan Kăng kong tơnêi têa ƀă diâp Medái Pêi cheăng ối má Môi ăm tâi tâng Vi ƀan Kăng kong Tơnêi têa, Khu xiâm tơpui kâ. Tơpui a rôh leh, Ngế pro xiâm hnê ngăn tơnêi têa tối nhên kăng kong tơnêi têa cho tơdroăng ki tĭng, tro ƀă tơdroăng rêh kâ ối dêi hdroâng mơngế Việt Nam.

Mâu ngế pêi cheăng a tíu kăng kong kal hlê plĕng trâu ‘na tơdroăng ton nah, túa lĕm tro ‘nâi nhên ki ai khât dêi tơnêi tơníu vâ pơkâ tơleăng tro tơdroăng, rak vế ki pơxúa tơnêi têa a rôh tơpui tơno ƀă a tơnêi tíu.

Ngế pro xiâm hnê ngăn tơnêi têa pơkâ thế Vi ƀan Kăng kong Tơnêi têa pơtối rak vế tơniăn khât ki pơxúa tơnêi têa – hdroâng mơngế, rak krá tơniăn krê, hnoăng pơkuâ, tâi tâng tơnêi tơníu, rak vế tơdroăng ki hơniâp lĕm, tơniăn, mơjiâng pro troăng prôk kăng kong hơniâp lĕm, tơrŭm tơroâ, tơrŭm mơnhông krá tơniăn.