A hneăng hôp, teăng mâ Khu râ kăn teăng mâ Kuô̆k hô̆i kong pơlê Dak Lak hiăng tối troh kuăn pơlê mâu tơdroăng ki châ tơƀrê ki kal dêi hneăng hôp, tung mê tối rơdêi kơxô̆ hên ‘nâng mơ-éa luât ƀă tơdroăng pơkâ châ tơbleăng ăm pêi pro; mâu troăng pơkâ pêi kân ‘na mơnhông cheăng kâ - rêh ối pơlê pơla, liăn ngân tơnêi têa; rơtế tơdroăng rah xo mơngế pêi cheăng ƀă hên tơdroăng ki xiâm tơdjâk troh tơdroăng rêh ối kuăn pơlê.

Kuăn pơlê kong pơlê Dak Lak tối tơdroăng ki môi tuăn ƀă mâu tơdroăng châ tơƀrê ki Kuô̆k hô̆i hiăng châ, tơdrêng amê tối hên rơkong pâ thế vâ pơtối kêi đeăng troăng hơlâ ƀă tơleăng mâu tơdroăng nôkố dêi kong pơlê.

Tung kơxô̆ mâu tơdroăng xiâm châ kuăn pơlê Dak Lak tơmâng tŏng gum tơbleăng tối tơdroăng phon rơvât, hdrê loăng plâi, mơnăn păn ki ôh tá dâi lĕm châ tơbleăng tơ’lêi hlâu ƀă hlo ai hên hĭn tung um tiô troăng hyôh măng. Kuăn pơlê pói vâ mâu kơvâ cheăng pêi pro kơtăng tơdroăng pơkuâ kơchơ mơdró tơmeăm pêi lo ing chiâk deăng, mơdât tơdroăng ki mơđah tơbleăng ki ôh tro tiô tơdroăng ai khât ƀă pơxâu phâk kơtăng mâu ngế ki pro xôi.

Rơtế amê, mâu tơdroăng kuăn pơlê rêh ối ki ê xuân châ hên kuăn pơlê kong pơlê Dak Lak tối troh, ki má lối cho mâu tơmeăm rơchôa long têa tro tơ’nhê râ klêi kơ’nâi kong mêi têa lân lu pơla kố nah. Kuăn pơlê pơkâ thế kong pơlê rĕng séa ngăn, tâi tâng tơmeăm ki tro tơ’nhê ƀă xing xoăng mơngế troh rơnêu, vêh mơjiâng mâu tơmeăm ki tro tơdjâk.