Kơxê hâi lơ 15/12, a Hưng Yên, pôa Tô Lâm Kăn xiâm pơkuâ hnê ngăn Đảng rơtế ƀă mâu kăn Kuô̆k hô̆i kong pơlê hiăng trâm mâ  kuăn pơlê a cheăm Kiến Xương, Lê Lợi ƀă Quang Lịch, tơbleăng tơdroăng ki kal dêi Rôh hôp má 10, Kuô̆k hô̆i hneăng 15 hlối tơmâng, tiâ mâu tơdroăng pâ thế dêi kuăn pơlê. Kăn xiâm pơkuâ hnê ngăn Đảng ăm ‘nâi tơdroăng cheăng kâ- pơlê pơla tung tơnêi têa pơtối tơniăn, xông nếo tung pơla lâp plâi tơnêi ối ai hên tơdroăng ôh tá tơniăn; tơdjâk troh hbrâ Hôp tung lâp tơnêi têa rôh má 15 dêi Đảng dế châ tơbleăng kơtăng , tŭm, tiô tơdroăng tơkŭm po a khế 1 la ngiâ.

‘Na tơkŭm mâu kăn kong pơlê péa râ, Kăn xiâm pơkuâ hnê ngăn Đảng hnê tối thế rĕng pro rế lĕm tíu pêi cheăng, tơmeăm khoăng tơnêi têa, mơdêk ki tơƀrê dêi mâu kăn ƀô̆ cheăm bêng, thế xoăng râ, xoăng hnoăng cheăng pêi. Rôh kố,  Kăn xiâm pơkuâ hnê ngăn Đảng  ăm 30 toăng kơmăi tính ăm pái to cheăm a Hưng Yên; lăm pôu, hbru tơmeăm ăm  rơpŏng pôa Nguyễn Trọng Hiếu,  ngế tro rong râ xúa tơplâ, ngế ai hnoăng tơnêi têa tung cheăm kong pơlê.