Jâ Rơ Châm H’Yéo, ối a bêng Pleiku, kong pơlê Gia Lai-Ngế cheăng tung Khu pơkuâ hnê ngăn Đảng uỉ kong pơlê hneăng hdrối, Kăn hnê ngăn Vi ƀan Măt trâ̆n Tơnêi têa Việt Nam kong pơlê Gia Lai hneăng hdrối hiăng tí tăng vâ ‘nâi nhên khât ‘na Hneăng hôp kân mâu kăn teăng mâ lâp tơnêi têa roh má XIV dêi Đảng. Yâ H’Yéo ai tối tiah kố, kơnôm ai tơdroăng pơkuâ ngăn ƀă tŏng gum ki tơviah kân dêi Đảng ƀă kơpong hdrông kuăn ngo, tơdroăng rêh kâ ối-pêi cheăng dêi kuăn pơlê a Gia Lai tối krê ƀă Tây Nguyên tối tơdjuôm hiăng thă mơdêk a’ngêi tâ, ƀă pơhlêh hên tơdroăng cheăng.

“Kuăn pơlê hdrông kuăn ngo Tây Nguyên môi tuăn tiô Đảng, tiô Pôa Hồ. Pói rơhêng Đảng pin pơtối tŏng gum, ngăn khât ăm Tây Nguyên pơtối mơnhông ‘na pêi cheăng kâ, pêi lo kế tơmeăm, túa lĕm tro, hnê hriâm, ƀă túa cheăng ki mơjiâng ăm Tây Nguyên kro mơdrŏng na kế tơmeăm, kro ‘na hloh hlê rơkê plĕng. Mê cho mâu tơdroăng ki kal má môi”.

Ing mâ ngăn dêi hên ngế tung hơnăm hdrối mê hía nah, cho mâu khu ngế ki veăng pơkâ troăng tơdjâ ƀă hnê ngăn troăng hơlâ tŏng gum ăm kuăn ngo, pôa KSor Phước, ối a Gia Lai-Cho Ngế cheăng tung Tíu xiâm Đảng, cho Kăn pơkuâ hnê ngăn Vi ƀan Kuăn ngo dêi Chin phuh vêh mơnhên, hnoăng cheăng troăng hơlâ ‘na kuăn ngo ƀă mâu túa cheăng ivá tŏng gum ăm mâu pơlê cheăm hdrông kuăn ngo hiăng châ Đảng ƀă Tơnêi têa chân tuăn pơkâ pêi pro đi đo. Pôa Ksor Phước loi tơngah tung hneăng ki nếo, Đảng ƀă Tơnêi têa kô tŏng gum pơkâ pêi pro châ pơxúa kân khât, pơtối rak vế khôi túa, vêa vong lĕm tro dêi kuăn ngo, mơnhông mơdêk rak vế tơnêi tíu krip tơdrŏm, rak vế mâu tíu tơbâ hnoăng cheăng kâ roh tơplâ nah vâ mơnhông ‘na hnoăng cheăng túa lĕm tro, ôm hyô krá kâk, hnối thăm pêi lo kế tơmeăm pêi tơdrêng ƀă rak vế mâu khôi túa lĕm tro dêi kuăn ngo.

“Ki xiâm dêi hnoăng kuăn ngo cho tơdroăng ki kal kân păng ‘nâng, xua ing mê khu ki ‘mêi hmâ tí tăng tôm xo vâ tí tăng pro pơloi, pơloăng, vâ pro tơ’nhiê tơdroăng tơrŭm hdrông mơngế. Ki tro má môi mê thế mơjiâng lĕm tro hnoăng cheăng ki kuăn pơlê veăng kring vế, gak ngăn Tơnêi têa, thăm mơdêk hnoăng pơkuâ rak ngăn tung tuăn i hiâm lâp kuăn pơlê, ‘mâi mơnhông hnoăng kring vế tơnêi têa tung mơnhông pêi cheăng kâ-rêh ối pơlê pơla ăm i tơtro. Mơnhông pêi cheăng kâ cho vâ thăm mơdêk kring vế, gak ngăn cheăng kâ-rêh ối kuăn pơlê tơniăn ƀă kring vế gak ngăn cho vâ mơnhông pêi cheăng kâ, pêi lo kế tơmeăm. Kố cho hiâm mơno ki á pói rohêng vâ má môi a hneăng hôp kân dêi Đảng ƀă tâi tâng lâp tơnêi têa, malối, ƀă mâu kơpong hdrông kuăn ngo ki iâ mơngế a Việt Nam”.

A kơpong Tây Bắc, hdrông kuăn ngo ki iâ mơngế xuân dế tơkôm hmâng Hneăng hôp kân mâu kăn teăng mâ roh má XIV dêi Đảng, hiăng ai tuăn i hiâm pói rơhêng vâ mâu troăng pơkâ ki kal dêi Đảng tung drô troăng ki vâ mơnhông mơdêk ki nếo. Pôa Nguyễn Văn Độ, đảng viên a pơlê Hưng Hà, cheăm Chiềng Khương, kong pơlê Sơn La pói tơngah, Hneăng hôp kân Đảng má 14 kô pơtối mơ’no mâu troăng hơlâ, troăng tơdjâ, ai troăng prôk ki vâ pêi pro ton xŏn, krá kâk, tơtro ƀă tơdroăng ki ai păng ‘nâng dêi kơpong hdrông kuăn ngo ki iâ mơngế, ki rơhêng vâ tối tung mơnhông pêi cheăng kâ hnối pêi adrêng ƀă kơdroh kơklêa, kơtiê xahpá, mơnhông rêh kâ ối krá tơniăn ton.

“Ngin pói rơhêng vâ Đảng ƀă Tơnêi têa pơtối tŏng gum tơ’lêi hlâu ăm kuăn pơlê châ mung liăn i hên tâ. Tơdrêng amê, pơtối mơhnhôk hnê, tŏng gum ăm khu mơdró kâ mơ’no liăn cheăng vâ uâ mơdi, mơjiâng pro kế tơmeăm dâi khât tâ tung mâu pơlê cheăm hơngế hơngo, trối têng, uâ mâu tơmeăm ki pêt mơjiâng, chêh, siê, mâu hơ’nêh mơnăn ki păn, ká xixŏng ki mơjiâng vâ gun ăm hnoăng pêi cheăng kâ châ tơtêk hên tâ, châ pêi lo liăn ngân hên tâ ăm kuăn pơlê”.

Kăn ƀô̆, đảng viên ƀă kuăn pơlê cheăm Chiềng Khương, kong pơlê Sơn La xuân hiăng mơhno tối, pói rơhêng vâ mâu hnoăng cheăng xiâm tơnêi têa pơtối châ pơkâ pêi pro tơdrêng, châ tơƀrê, ai pơxúa, malối Hnoăng cheăng mơnhông pêi cheăng kâ-rêh ối pơlê pơla kơpong hdrông kuăn ngo ki iâ mơngế ƀă kong ngo, ngăn mê cho tíu ki xiâm ki kal gum kuăn pơlê ai tơ’nôm ivá cheăng tung mơ’no liăn pêi chiâk pêi deăng, krá tơniăn tơdroăng rêh kâ ối. Pôa Đào Việt Phương-Phŏ Kăn hnê ngăn Đảng ủi cheăm ai tối tiah kố:

“Ngin loi tơngah ƀă pói vâ a Hneăng hôp kân 14 dêi Đảng kô pơtối mơ’no mâu troăng hơlâ, troăng pơkâ ki hơngế rơdâ, ing mê, mơjiâng ivá ki ó rơdêi vâ mơnhông pêi cheăng kâ-rêh ối pơlê pơla krá tơniăn tung hneăng ki nếo. Kuăn pơlê pói rơhêng châ Đảng, Tơnêi têa tŏng gum ‘na pêi chiâk pêi deăng; ai troăng hơlâ tŏng gum pơlê cheăm tơtro vâ gum ăm kuăn pơlê pêi chiâk pêi deăng châ lo hên kế tơmeăm vâ ing mê khoh châ tê mơ’no, châ lo liăn ngân. Tơdrêng amê, pói tơngah Đảng pơtối ai troăng hơlâ ki nếo, ai troăng tơdjâ vâ mơnhông pêi cheăng kâ-rêh ối pơlê pơla châ mơnhông tơtêk tơtro ƀă kơpong ki ối tíu tơkăng kong, mơnhông ăm cheăng kâ a kơpong bo cheăng tíu tơkăng kong rế tơtêk hên tâ”.