Tiô tơbleăng dêi thái hnê Lê Văn Lâm, pơkuâ ngăn Hngêi trung râ má péa pơlê kân Đăk Hà, tơring Đăk Hà, kong pơlê Kon Tum, a hâi lơ 5/10 pơla kố nah ai khu ngế tối dêi tơná kăn ƀô̆ séa ngăn kŏng an kong pơlê Kon Tum ƀă Khu xiâm Kŏng an tơpui ing phôn tối ‘na tơdroăng thái ai tơdjâk troh môi roh tê mơdró ma tŭi  kân.

Vâ ôh tá tơdjâk troh mơngế nhŏng o tung rơpŏng hngêi xuân môi tiah vâ châ tơniăn lĕm, ing djâ troăng ƀă pro pá dêi khu ngế ki lu lêa kố, thái Lâm hiăng mung 1 rơtal 100 rơtuh liăn pơtroh a tai khoăn a môi hngêi arak liăn klêi mê tro vâi xo tâi tâng kơxô̆ liăn. Thái hnê Nguyễn Văn Hiền, Thái pơkuâ hngêi trung râ má péa pơlê kân Đăk Hà, tíu thái Lê Văn Lâm dế hnê tối ăm ‘nâi:

“Drêng thái Lâm tối tơbleăng mê á pơkuâ hngêi trung tơdrêng amê mơhnhôk thái lăm tơbleăng ăm Kŏng an tơring. ‘Na peăng á mê á tơbleăng ăm Đảng ủy, Vi ƀan. Kơxo hâi kố cho thái Lâm lăm a Kŏng an kong pơlê’’.

Rơtế ƀă thái yăo Lê Văn Lâm, ối a pơlê kân Đăk Hà, tơring Đăk Hà, cô hnê Hồ Thị Thu Sương, Hngêi trung râ má pái Trần Quốc Tuấn xuân tro mâu ngế lu lêa tung măng châ 270 rơtuh liăn.

Tơbleăng dêi cô Sương ăm hlo, hâi lơ 9/10 pơla kố nah, cô veăng tơdroăng rah xo ca sih. Tiô pơkâ dêi tơdroăng, kơxô̆ liăn thế nâp ăm rêm hnoăng cheăng tâk chôa ‘nâng troh 100 rơtuh liăn. Drêng ki hên má môi mâu ngế lu lêa thế cô nâp 220 rơtuh liăn mê nếo châ xo kơxô̆ liăn 100 rơtuh hiăng nâp hdrối mê.

Drêng tơdroăng rêh ối pá puât, pơtối ai tơdroăng khéa cô Hồ Thị Thu Sương hiăng mung 170 rơtuh nâp ăm tơdroăng nếo ‘nâi dêi tơná hiăng tro lu lêa.

Tơdroăng mâu thái cô a tơring Đăk Hà, kong pơlê Kon Tum tro hlôp ôh tá xê to tro lŭp ‘na cheăng kâ dêi ngế krê mê ối pro tíu pêi cheăng thái cô tơ’nôm tơdroăng cheăng, tơ’nôm hnoăng. Thái hnê Mai Xuân Kiên, Thái pơkuâ hngêi trung râ má pái Trần Quốc Tuấn, tối ăm ‘nâi:

“Klêi kơ’nâi cô tro môi tiah mê, mê hngêi trung ‘nâi tơdroăng, pơtroh Kŏng đoân hngêi trung đi đo ối achê cô tá kơmăng ki mê đi đo mơhnhôk hiâm mơno cô ví cô lơ pêi pro tơdroăng ki ôh tá tro. Mơhno troăng prôk ăm cô tung tơdroăng tơpui ƀă kơ koan cheăng ƀă hngêi trung xuân pơtối mơhnhôk xuân môi tiah séa ngăn cô vâ cô hmiân tuăn’’.

‘Na xiâm kối chiâng ai tơdroăng hên thái cô tung tơring tro hlôp, lu lêa tung măng, jâ Lê Thị Nhung, Kăn pơkuâ Ƀơrô hnê hriâm ƀă Hnê mơjiâng tơring Đăk Hà, kong pơlê Kon Tum, tối ai hên xiâm kối:

“Mơhé hiăng châ pơchân tối ing kơ koan cheăng, ki rơhêng vâ tối ing kŏng an. Laga xuân ai tơdroăng thái cô loi tơngah tung mâu rơkong pơlông djâ. Mơni thái cô tá hâi mơnhên châ ngế ki mê vâ pro ki klâi? Má péa nếo, mơni thái cô dế kal kơxô̆ liăn ki lâi ‘lo vâ xúa ăm dêi châ chăn krê tơná lơ rơpŏng xua mê veăng tơdroăng mê. Má pái tung tơdroăng lu lêa thái cô tơmiât dêi tơná klêh tung tơdroăng mê khât xua mê pêi tiô hnê mơhno mê klêi mê pơtroh liăn’’.