Tung hên hơnăm hdrối mê hía nah, a kong pơlê Gia Lai, pakĭng hnoăng cheăng hbrâ tơplâ ƀă mơnhông cheăng kâ gâk kring tơnêi têa, mâu khu mô đô̆i hiăng pêi pro hên troăng pêi mơhnhôk kuăn pơlê rơkê, veăng gum drêng pá puât, kum kuăn pơlê tơniăn tăng cheăng pêi, vâ mơdêk ki dâi lĕm tơdroăng rêh ối.

Pêi pro troăng pêi “Rêm măng tĭng gum môi rơpŏng kơtiê’’, sap hơnăm 2023 troh nôkố, Mô đô̆i gâk kring tơkăng kong dêi kong pơlê Gia Lai hiăng tŏng gum 750 rơpŏng kơtiê, rơpŏng vâ chê kơtiê ƀă mâu rơpŏng ai hnoăng tơnêi têa; mơhnhôk lối 810 rơtuh liăn, 1 tâ̆n 7 tă phái, 47 toăng rơxế tăng cheăng pêi rơtế vâ chê 3.000 hâi pêi cheăng kum kuăn pơlê rơnêu hngêi trăng.

Hơnăm 2024, troăng pêi châ Khu pơtâng tối tơdroăng kal tơnêi têa nhuô̆m môi tung tơpah troăng pêi ‘’Pơtâng tối kuăn pơlê rơkê’’ kơhnâ rơkê lâp tơnêi têa. Đăi tă Khuất Bá Cao, Kăn pơkuâ hnê ngăn Đảng ủi, Phŏ Kăn xiâm pơkuâ Ƀinh đoân 15, tối ăm ‘nâi: ƀă troăng pêi “tŏng gum tăng cheăng pêi, pro eăng bâ tơdroăng loi tơngah’’, krê hơnăm 2024, Ƀinh đoân hiăng kêi đeăng 23 tơmeăm ƀă vâ chê 45 km troăng on tơhrik, 1.500 trăng on, tâi tâng kơxô̆ liăn 4 rơtal liăn; hơnăm 2025 tiô tối hdrối pêi pro tơ’nôm 13 kế tơmeăm, ki kơnâ lối 3 rơtal liăn.