Kố cho tơdroăng a roh hôp khu chêh hlá tơbeăng kơxo lơ 27/2 xua Khu xiâm pơkuâ lêng tơrŭm ƀă Khu kăn pơkuâ hnê ngăn Đảng kong pơlê Dak Lak tơkŭm po. Hôp tơpui tơno vâ mơnhên, pro trâu hơngế tơ’nôm ‘na râ, ki kơnâ dêi Ƀlêi trâng Tây Nguyên ƀă roh tơplâ xâ Mih, tŏng xo tơnêi têa; ti tăng xiâm kối ƀlêi trâng, xo vế mâu túa ki rơkê tơtro vâ pơtối xúa tung tơdroăng mơjiâng ƀă gâk kring Tơnêi têa nôkố.

Tơdrêng amê, pro ô eăng mâu tơdroăng châ tơƀrê dêi Đảng ƀô̆, khu râ kăn pơkuâ ƀă kuăn pơlê mâu kong pơlê Tây Nguyên tối tơdjuôm ƀă kong pơlê Dak Lak tối krê klêi kơ’nâi 50 hơnăm pro lĕm tơdroăng châi xua tơplâ, mơnhông ki kơnâ hơniâp lĕm ƀă tơdroăng pêi pro khŏm tơplâ, khŏm ƀlêi trâng dêi Ƀlêi trâng Tây Nguyên hơnăm 1975 tung pêi pro tơdroăng pơhlêh nếo.

Pơtối mơnhông khôi túa lĕm tro hdroâng mơngế ƀă tơmeăm ki ai hlâu dêi kong pơlê, mơnhông tơdroăng ki khŏm mơ-eăm ƀă pói vâ xông mơ-eăm dêi tơná tung châl nếo dêi hdroâng mơngế, mơjiâng kơpong pêi cheăng ton xŏn Tây Nguyên ƀă kong pơlê Dak Lak rế hía rế kro mơdrŏng lĕm, rơkê.