VOV4.Xơ Đăng - Hlá cơ khêi hơlŏng trĭng kơneăng a mâu kuâ hngêi a ƀuôn Drang Phôk, cheăm tơkăng kong Krông Na, tơring Ƀuôn Đôn, kong pơlê Dak Lak cho um méa ki lĕm, tối nhên hnoăng pơkuâ a tíu tơkăng kong dêi Tơnêi têa. Mâu hlá cơ Tơnêi têa nếo châ diâp tung mâu tơdroăng pêi pro Khế pái tơkăng kong xua Khu pơkuâ ngăn Đoàn droh rơtăm 2 kong pơlê Dak Lak ƀă Lâm Đồng tơkŭm po, kum vâi krâ nhŏng o ai tơdroăng hơ’lêh ăm hlá cơ ki ton, mơngiơk hiăng ôh tá khêi lĕm xếo, vâ hlá cơ khêi hơlŏng trĭng đi đo kơneăng a pơlê, cheăm kơpong tơkăng kong.

Tơdah hlá cơ Tơnêi têa nếo châ diâp ăm, nâ H’Bố Mlô, ối a ƀuôn Drang Phôk, cheăm Krông Na, tơring Ƀuôn Đôn phiu ro păng ‘nâng. Nâ H’Bố tối, kô rĕng kơtúa hlá cơ kố teăng hlá cơ ton kơtúa sap ing hơnăm nah hiăng ôh tá lĕm xếo. Hên hơnăm hiăng hluâ, kơtúa hlá cơ Tơnêi têa hiăng chiâng tơdroăng cheăng đi đo dêi mâu rơpŏng tung ƀuôn Drang Phôk, mơhé hâi tiah hmâ lơ roh leh têt.

Rêm rơpŏng hmâ lăm tung kong ti tăng ko mâu kơlá ki xŏn ƀă tơdrăng pro loăng vâ kơtúa hlá cơ a ngiâ hngêi krip krih. Nâ H’Bố hơ’muăn tối:

‘’Hơnăm ki lâi tung pơlê mâu rơpŏng hngêi pơrá châ tơdah hlá cơ mê hngêi á xo hlá cơ kơtúa a ngiâ hngêi. Á hlo phiu ro ƀă kơnía ‘nâng châ tơdah hlá cơ, môi tiah phiu ro, mơnhên hnoăng pơkuâ dêi tơnêi têa pin’’.

Diêp hlá cơ Tơnêi têa ăm kuăn pơlê ƀuôn Drang Phôk

Ƀuôn Drang Phôk cho pơlê hơngế má môi dêi tơring Ƀuôn Đôn, ối tung dế dêi kơdrum ilâng kong tơnêi têa Yok Đôn, kơtăn tơkăng kong ƀă kong têa Kul dâng 50 km. Pơlê ai vâ chê 140 rơpŏng ƀă lối 500 pơ’leăng mâ mơngế, tung mê ai 86% cho mơngế hdroâng kuăn ngo. Pôa Y Tê ɃKrông, Kăn pơkuâ hnê ngăn chi ƀô̆ Ƀuôn Drang Phôk tối ăm ‘nâi, kơnôm châ Tơnêi têa mơ’no liăn, mâu hơnăm achê kố, ngiâ méa pơlê hiăng ai hên pơ’lêh, chiâng lĕm rơdâ tâ há. Ki rơhêng vâ tối, ƀă tơdroăng pơtâng tối khu râ kăn pơkuâ, kuăn pơlê hiăng hmâ kơtúa hlá cơ Tơnêi têa a ngiâ hngêi ƀă drô troăng tung pơlê. Rêm roh hlá cơ ki lâi hiăng ton lơ mơngiơk ôh tá khêi xếo, kuăn pơlê pơ’lêh ki nếo ƀă pơkuâ rak lĕm.

‘’Mâu hâi leh kân, hâi kân krip ƀă hơngui apoăng hơnăm mê ai tơdah hlá cơ nếo xua mê kuăn pơlê kơtúa hlá cơ phiu ro hơnăm nếo ƀă mâu hâi kân krip ƀă hiâm mơno kuăn pơlê phiu ro. Kố cho troăng pơtâng tối hiâm mơno pâ nhuô̆m tơnêi têa lơ nhuô̆m hdroâng mơngế, phiu ro hâi ƀlêi trâng vâ ing mê pơhlêh tơdroăng tơmiât ƀă tơdroăng rêh ối kuăn pơlê pơ’lêh tơ-ê tâ’’.

Khu pơkuâ Đoân droh rơtăm Dak Lak ƀă Lâm Đồng hiăng diâp 150 hlá cơ

Tơnêi têa ăm kuăn pơlê pơlê tơkăng kong Drang Phôk tung tơdroăng Khế pái tơkăng kong hơnăm kố

Tung tơdroăng pêi cheăng khế pái tơkăng kong nếo châ tơkŭm po, Khu pơkuâ ngăn Đoân droh rơtăm 2 kong pơlê Dak Lak ƀă Lâm Đồng hiăng diâp 150 plâ hlá cơ Tơnêi têa ăm kuăn pơlê ƀuôn Drang Phôk. Kố cho tơdroăng pêi dêi rơxông ối nếo 2 kong pơlê vâ kum pơtâng tối tơdroăng tuăn pâ pơlê xiâm tơnêi têa, mơhnhôk kuăn pơlê kơpong tơkăng kong đi đo tơmiât troh Tơnêi têa, mơjiâng pơlê xiâm tung kơpong tơkăng kong rế hía rế kro mơdrŏng lĕm.

Ngoh Y Lê Pas Tơr, Kăn phŏ hnê mơhno má môi Khu pơkuâ ngăn Đoân droh rơtăm kong pơlê Dak Lak tối ăm ‘nâi:

‘’Ngin xuân ai diâp mâu hlá cơ Tơnêi têa ăm kuăn pơlê rêh ối tung cheăm Krông Na. Kố cho tơdroăng pêi ki pơxúa rế mơhnhôk kuăn pơlê pơtối loi tơngah, hmiân tuăn pêi cheăng, rêh ối vâ gak kring hnoăng pơkuâ tơnêi têa’’.

Mâu hlá cơ châ  kuăn pơlê kơtúa krip krih a ngiâ hngêi

Um hlá cơ Tơnêi têa kơneăng a tíu ngiât lĕm kơpong tơkăng kong rế pro tơdroăng ki phiu ro dêi rêm ngế kuăn pơlê a pơlê tơkăng kong Drang Phôk. Kơtúa hlá cơ Tơnêi têa ôh tá xê to tơdroăng ki lĕm tro, mơhno hiâm mơno pâ nhuô̆m tơnêi têa ƀă tơdroăng ki pâ mơnê hnoăng mâu ngoh khên tơnôu hiăng hlâ tung tơplâ xâ xua tơnieăn krê dêi hdroâng mơngế. Ing mê, thăm pro rêm ngế kuăn pơlê, ki má lối rơxông ối nếo pơtối pleăng ivá drêng hơnăm ối nếo vâ mơjiâng ƀă gak kring pơlê xiâm.

H’Xíu H’Mok chêh

A Sa Ly tơplôu ƀă tơbleăng