O Võ Thị Như Ngọc, Kăn pơkuâ hnê ngăn Chi đoân 12A1, Hngêi trung râ má pái phôh thong Lê Qúi Đôn, pơlê kong kơdrâm Ƀuôn Ma Thuột, kong pơlê Dak Lak cho môi tung mâu hok tro ki rơkê khât, mơngế kơhnâ châ rah xo mot tung Đảng drêng xiâm nếo châ 18 hơnăm. Kố cho tơdroăng vâ mơnhên ki tơxâng ‘na mâu tơdroăng ki kơdo mơ-eăm tung hriâm tâp ƀă tơdroăng uăn pât dêi hiâm mơno tơná mâu vâi o tung hên hơnăm. Như Ngọc ai tối tiah kố:

“Á tâ dêi tơná cho hâk tơngăm păng ‘nâng. Kố xuân cho roh ki tơ’lêi hlâu vâ mơnhông dêi hiâm tuăn tơná ƀă mơhno bâ eăng ăm tơdroăng ki kơhnâ khât, tơdroăng kơdo mơ-eăm bâ eăng troh mâu vâi pú ki ối tâ ta tung hngêi trung”.

Ƀă o Nông Quốc An, hok tro hngêi trung râ má pái phôh thong Võ Nguyên Giáp, tơring Ea Kar, kong pơlê Dak Lak đi đo kơdo mơ-eăm, pât dêi tuăn mơno tơná, châ plah inâi hok tro rơkê tung hên kơvâ ƀă kơhnâ khât tung hnoăng cheăng dêi Đoân Droh rơtăm. Khế 8/2023, Nông Quốc An hâk tơngăm châ rah xo mot tung Đảng drêng dế ôí hriâm a hngêi trung.

“Tung mâu hơnăm dế hiâm râ má pái nah, á hiăng kơdo mơ-eăm hên khât tung mâu tơdroăng cheăng dêi hngêi trung. Á o hâk nâ ‘nâng drêng hiăng châ mot tung Đảng. Hiâm mơno kố á o pơtối kô mơnhông hên tâ nếo tung la ngiâ”.

Tiô pôa Nguyễn Tiến Dũng, Kăn pơkuâ hnê ngăn, Kăn ngăn hngêi trung râ má pái phôh thong Võ Nguyên Giáp, châ mơjiâng pro a hơnăm 2021, hngêi trung ai 27 ngế đảng viên. Klêi kơ’nâi mơjiâng nah, Chi ƀô̆ hiăng tŏng gum ngăn khât troh tơdroăng cheăng ki mơjiâng, mơnhông cheăng đảng viên. Ôh ta xê to tăng mâu ngế ki vâ pro kăn ƀô̆, thái cô, mơngế cheăng, mê hngêi trung ối tŏng gum, veăng mơnhông tơdroăng cheăng Đảng ƀă mâu vâi o hok tro ki rơkê kơhnâ. Vâ khoh châ tăng hlo ‘na tơdroăng mê, tăng rah mâu ngế ki rơkê kơhnâ, pakĭng tơdroăng hriâm chư, mê mâu vâi o ối hnê mơhnhôk veăng pêi pro mâu tơdroăng ki nếo, tơdroăng pơlê pơla vâ hlê plĕng nhên ‘na túa cheăng, tuăn mơno cheăng kal kí. Pôa Nguyễn Tiến Dũng tối ăm ‘nâi:

“Ki xiâm dêi tơdroăng ki kal mê cho hnoăng ing Khu hnê ngăn Đoân Droh rơtăm hngêi trung, tí tăng ngăn nhên tơdroăng ki hriâm tâp dêi vâi pú, tung pơla kơdo mơ-eăm, tơdroăng ki pleăng dêi hnoăng cheăng mâu vâi o. Ki má péa nếo cho kơnôm ing mâu thái cô pơkuâ hnê lâm, mâu thái cô ki hnê ƀô̆ môn vâ tơniăn ăm vâi o ki rơkê kơhnâ ‘na tơdroăng cheăng Đoân, tơdroăng cheăng mâu vâi droh rơtăm. Tơdrêng amê, ai châ hriâm rơkê khât, tung tơdroăng hriâm pât dêi tuăn i hiâm, vâ la ngiâ châ mot tung khu Đảng”.

Ing hơnăm 2020 troh nôkố, lâp kong pơlê Dak Lak hiăng ‘mot châ 368 ngế đảng viên cho hok tro; krê tung hơnăm 2024 ai 200 ngế hok tro châ mot Đảng. Tiô pôa Đỗ Tường Hiệp, Phŏ Kăn hnê ngăn Khu ngăn ‘na hnê hriâm ƀă hnê mơjiâng tuăn ngôa rơkê dêi kong pơlê Dak Lak tối ăm ‘nâi, ki tơƀrê dêi tơdroăng kố cho tơdroăng ki hlê plĕng vâ mâu hngêi trung hnê hriâm pơtối châ mơnhông cheăng Đảng tung hok tro. Ing mê, rế rak vế tơniăn tơdroăng hriâm tâp, rế veăng pêi pro mâu tơdroăng cheăng vâ ‘mâi rơnêu pât dêi tuăn mơno tiô kơ tơdroăng ki pơkâ thế ƀă mâu vâi o. Tung la ngiâ kố ah, Khu ngăn ‘na hnê hriâm ƀă hnê mơjiâng tuăn ngôa rơkê tơrŭm ƀă mâu khu râ Đảng, hngêi trung vâ ing mê châ tơ’lêi hlâu tâ tung tơdroăng cheăng, tíu cheăng vâ hnê pât ăm mâu vâi o. Pôa Đỗ Tường Hiệp tối ăm ‘nâi:

“Hnoăng cheăng ki mơnhông cheăng Đảng tung hngêi trung châ tŏng gum ngăn khât. Ki rơhêng vâ tối, mê cho tung khu hok tro. Mâu đoân viên ki rơkê kơhnâ tung hngêi trung râ má pái phôh thong kô châ hnê tối ‘na cheăng kal kí, ‘na tuăn  hiâm mơno ƀă ai tơdroăng ki pói rơhêng vâ hnoăng cheăng kăch măng vâ pơtối hriâm ing mê ah drêng hiăng tơxâng nếo châ ăm mot Đảng vâ mâu vâi o ai troăng hơlâ kơhnâ khât tâ tung mơnhông cheăng tung la ngiâ”.

Tơdroăng ki ‘mot hok tro mot Đảng ôh ta xê to hiâm tuăn ki hâk nâ dêi rêm  ngế krê, mê ối cho vâ vêh mơnhên hnoăng cheăng dêi rêm rơxông hơnăm ối nếo Dak Lak tung mơjiâng ƀă mơnhông pơlê pơla, tơnêi têa. Mâu đảng viên hơnăm ối nếo ki hriâm tung hngêi trung mê cho mâu khu ngế ki hiăng khên, tơnôu mơ-eăm, pói rơhêng vâ châ pơtối ƀă mơnhông hnoăng cheăng Đảng tung la ngiâ.