Tung khế 8 pơla hdrối kố nah, hmâ a mâu rôh kơxo má, mâu lâm hriâm hnê tơ’nôm nâl Xuăn ăm vâi hdrêng a Hngêi trung Râ má môi Nay Der, cheăm Gào, kong pơlê Gia Lai châ tơkŭm po tung tơdroăng ki hơniâp ro. Mâu vâi o châ hmâ ƀă ƀảng chư, hriâm tơpui, hriâm pơchuât, hriâm chêh ƀă ki kal tâ cho khên tơnôu tơpui ƀă cô yăo, pú hmâ. O Thin, a thôn Pley Nhao, cheăm Hào, mơhno dêi tơná hâk vâ ƀă mâu chôu hriâm môi tiah mê.

“Á lăm hriâm tâ ro khât. Hriâm Tiếng Việt hâk vâ khât”.

Hơnăm hriâm nếo kố, Hngêi trung Râ má môi Nay Der, cheăm Gào ai 123 ngế hok tro mot hriâm lâm Môi, ki hên cho mơngế Jarai. Xua mê tơdroăng hnê ƀă hriâm tơ’nôm nâl Xuăn cho tơdroăng ki kal khât. Ing tơdroăng ki ôh tá ‘nâi klâi, klêi kơ’nâi hriâm hmâ, mâu rơkong tiâ dêi mâu vâi o hiăng hleăng tâ. Mâu kŏng têk tiâ rơkong cô êng xuân hiăng khên tơnôu têk drêng cô kơ-êng. Ƀă cô yăo Lê Thị Thùy Khanh, mê cho mâu tơdroăng ki ro khât ăm tá hok tro ƀă cô.

“Lâm á hnê tâi tâng mâu vâi o pơrá cho hdrông kuăn ngo, ối a hngêi mâu vâi o hmâ tơpui ƀă nâl Jarai. La nôkố mâu vâi o hiăng mơ-eăm hriâm tâp, hiăng chía rơkê têm hâi. Nôkố mâu vâi o hiăng chiâng hlê cô hnê ƀai”.

Xuân môi tiah mê, a Hngêi trung Râ má môi Lê Hồng Phong, bêng Hội Phú, mâu lâm hriâm tơ’nôm nâl Xuăn xuân châ po tung mâu rôh pơtê hriâm. Mâu vâi o troh hngêi trung hmâ ƀă ƀảng chư cái, hriâm ngăn chư, hriâm pơchuât chư. A lâm hriâm, cô yăo Nguyễn Thị Hồng rế hnê chư, rế tơpui, kơ-êng vâ mâu vâi o hmâ ƀă túa ki hnê nâl Xuăn. Ai drêng ‘nâ, tơná cô xuân hriâm tơ’nôm mâu nâl Jarai dêi vâi o hok tro vâ tơdroăng hnê ƀă hriâm gá hmâ achê tâ.

“Mâu nôu pâ hiăng tơmâng ngăn troh tơdroăng ki hriâm tâp dêi mâu vâi kuăn ‘nĕng tơná, chơ vâi lăm hriâm ‘ló chôu ƀă hbrâ tŭm kế xúa tung hriâm tâp ăm mâu vâi muăn drêng troh a lâm. Ki hên mâu vâi o hiăng rơbot ƀảng chư cái, tâp chêh mâu chư ƀă pơchuât hiăng tơ’lêi hlâu ƀă hleăng chư tâ. Cô yăo xuân rế hriâm nâl kuăn ngo dêi mâu vâi muăn vâ ‘nâi nhên tâ mâu vâi muăn”.

Tiô cô yăo Trần Thị Kim Tuyến, ngế pơkuâ hngêi trung Râ má môi Lê Hồng Phong, ôh tá xê krê bêng Hội Phú, hên hngêi trung a kong pơlê pơrá tơbleăng mâu lâm hriâm tơ’nôm nâl Xuăn ăm vâi hdrêng hdrông kuăn ngo a rơnó pơtê hriâm. Hngêi trung hiăng hbrâ rơnáu mâu kơƀăng tăng, hlối xing xoăng mâu thái cô châ hriâm ‘na nâl Xuăn ăm hok tro hdrông kuăn ngo hdrối vâ mot hriâm lâm Môi ƀă 120 tiết hriâm tung pơla rơnó pơtê hriâm, gum vâi khên tơnôu mot tung hơnăm hriâm nếo. Cô Trần Thị Kim Tuyến ăm ‘nâi:

“Tung pơla hâi khế hnê nâl Xuăn hdrối vâ mot hriâm lâm Môi, mâu vâi o khên tơnốu tơpui tơno tâ. Mot tung hơnăm hriâm nếo, mâu vâi o kô veăng tơdjuôm ƀă mâu hok tro ƀă pêi pro châ tơdroăng pơkâ thế tung hriâm tâp”.

Klêi kơ’nâi ‘mot tơkŭm, kong pơlê Gia Lai ai kơxô̆ ngế kuăn pơlê hdrông kuăn ngo châ 23%. Tơdroăng ki hnê nâl Xuăn ăm vâi hdrêng hdrối vâ mot hriâm lâm Môi gum vâi o khên tơnôu tơpui tơno, loi tơngah tâ drêng mot tung hơnăm hriâm nếo. Kố xuân cho túa pêi ki kong pơlê Gia Lai pro tơ’nôm tơdroăng vâ vâi o kơpong xơpá hriâm tâp tơ’lêi hlâu tâ.