Hdrối mê, kơxê hâi lơ 20/1, hôp tơpui a tôh dêi mâu Kăn tung tơdroăng phiu ro tơniăn tá ai tơdroăng ki hiăng châ chiâng pêi pro, xơrá ‘nâi hnoăng dêi tơná, tuăn ngôa rơkê ƀă tơdrăng. Mâu tơdroăng veăng tối tơkŭm mơnhên tối trâu tâ mâu tơdroăng ki kân ai pơkâ ƀă tơdroăng mơnhông tơnêi têa tung mâu hơnăm la ngiâ, ing tơdroăng pê klêi luât, ‘mâi hơ’lêh khu kăn, mơdêk ivá pêi cheăng rak ngăn dêi tơnêi têa, troh mơhnhôk pêi cheăng ƀă kơxô̆,  mơnhông cheăng khoa hok, hơ’lêh hriĕn plĕng ki nếo, veăng mơdêk krá tơniăn ƀă rơkê plĕng hlối tơdâng tơ’mô pơlê pơla.

Veăng hnê tối mâu tơdroăng tung hlá mơ-éa chêh pơtroh, hên mâu kăn tối nhên pâ thế pơtối pơ’lêh tuăn tơmiât ki tro ‘ló tung pơkuâ ngăn, hnê mơhno tiô troăng mơnhông tơbrê, xo kuăn pơlê ƀă khu mơdró pro xiâm, hlối khŏm mơ-eăm tơkâ luâ tơdroăng pá, tíu ki dế pro pá mơdât ki vâ mơnhông cheăng kâ.

Mâu tơdroăng veăng tối mê mơhno nhên ki mơ-eăm kal kí, hnoăng cheăng pêi a ngiâ Đảng, a ngiâ kuăn Pơlê, veăng ‘no hnoăng pê klêi mâu tơdroăng chêh tung hlá mơ-éa pơtroh ăm hneăng Hôp, ai tiô pơkâ mơnhông tơnêi têa tung rơxông nếo.

-Tơdroăng pơxá inâi Hneăng hôp má XIV dêi Đảng tối nhên: ‘’Pá kơdâm hlá cơ ƀlêi trâng dêi Đảng, tơdjuôm ivá, môi hiâm mơno pêi pro ƀlêi trâng mâu pơkâ mơnhông tơnêi têa troh hơnăm 2030; pơkuâ dêi tơdroăng cheăng ton xŏn, xông mơ-eăm xêh, loi tơngah, prôk rơdêi tung chal xông mơ-eăm xêh dêi hdroâng mơngế...’’. Kố cho roh apoăng tơdroăng pơxá Hneăng hôp tối rơdêi tơdroăng ki pơkuâ xêh troăng pêi cheăng ton xŏn dêi hdroâng mơngế, chêh tối hiâm mơno mot tơrŭm trâu hơngế laga xuân rak krá khôi túa lĕm tro ro ƀă tơniăn krê.

Pakĭng mê, troăng pêi ‘’Tơrŭm môi tuăn – Kuăn pơlê pơkuâ dêi hnoăng cheăng – Pơkâ rak tơniăn pơlê pơla – Châ tơƀrê hluâ pơkâ – Mơnhông mơdêk’’ hiăng tơ’nôm tơdroăng ki xiâm ‘’Châ tơƀrê hluâ pơkâ’’. Tơdroăng kố mơhno tơdroăng khŏm mơ-eăm ôh tá xê to rak tơniăn mê ối thế mơjiâng mâu troăng pêi ki tơtêk têi. Tiô Thak sih Hà Trung Thành – Ngế thái hnê ki xiâm Kơvâ Xây dựng Đảng, Hok viê̆n Kăn ƀô̆ Pơlê kong kân Hồ Chí Minh tối, Tơbleăng kal kí dêi Khu pơkuâ Xiâm ôh tá xê to mơnhên troăng tơmiât pêi ton xŏn troh hơnăm 2030 mê ối djâ tơdroăng krếo, cho pơkâ pêi pro.

‘’Ƀai xông tơpui hiăng mơhno hiâm mơno pơhlêh nếo, mê cho tối rơdêi pơkâ mơjiâng troăng pêi ki rơdêi, păng ‘nâng, tối khât, pêi khât, tơdroăng châ tơƀrê ôh tá xê to ‘na cheăng kâ mê tá ‘na kal kí, rêh ối pơlê pơla ƀă khôi túa lĕm tro. Mơhno tơdroăng ki pói vâ hdroâng mơngế. Mơdêk tơdroăng ki pơkuâ xêh troăng pêi cheăng ton xŏn, mơ-eăm xêh, tơdroăng ki lo a troăng prôk ki Đảng ƀă kuăn pơlê hiăng rah xo’’.