Mâu chi ƀô̆ a mâu hngêi ki đông pêng têa DK1 hiăng rơtế tơkŭm po Hneăng hôp chi ƀô̆ châ tơƀrê lĕm, mơnhên tơdroăng tơrŭm môi tuăn, môi tuăn sap apoăng troh tui lui ƀă mơnhông hnoăng pơkuâ, đi đo pơhlêh nếo, mơdêk tơdroăng hôp Đảng, mơdêk tơdroăng cheăng khu kăn ƀô̆, đảng viên, pro xiâm kối tung pêi pro hnoăng cheăng, gâk kring krá tơniăn hnoăng pơkuâ têa kơxĭ, tíu ki krih tơviah dêi tơnêi têa a ko tơnêi têa.

Ƀă ki krê xêh dêi hngêi trá DK1 pro đông krê xêh a tíu ai tơdroăng rêh ối xơpá, hyôh kong prâi tơ-ê xêh ôh tá tơniăn, đi đo ai mâu khía kân plong luâ kơpong mê. Drêng ai tơdroăng pơkâ pêi kal athế ai tuăn chân tơnôu ‘na tơdroăng kal kí, ai tuăn chân ‘nâi kơdôu mơ-eăm, môi tuăn ƀă  Tơnêi têa, ƀă Đảng ƀă kuăn pơlê, chiu hlâ rêh xua vâ kring vế hnoăng pơkuâ tơnêi têa. Ing mê, tiô Đăi tă Trần Mạnh Chiến, Chính ủi Kơpong 2 dêi lêng Tuk: Tơdroăng mơjiâng ai tuăn châ krá tơdroăng kal kí, ai tuăn vâ mơ-eăm, vâ xo pêi tơdroăng cheăng vâ pê klêi tơdroăng pơcháu ƀă mâu kăn ƀô̆ mâu lêng dêi hngêi trá cho tơdroăng pêi pro ki xiâm, ôh tá pơtê ki Đảng ủy - Khu xiâm pơkuâ ngăn lêng Kơpong 2 dêi lêng Tuk đi đo tơmâng pêi pro.  

“Ngin ‘nâi nhên vâ chiâng pêi pro tơdroăng mê, thế  xúa tŭm tơdroăng pêi pro tro ƀă tơdroăng ai khât ki hlo khât nôkố. Tung mê, hnê mơhno mơdêk hnoăng cheăng pêi, ai tuăn chân krá‘na kal kí, ai tuăn mơ - eăm cho tơdroăng ki xiâm. Pơtối rak hnoăng djâ troăng ahdrối, tuăn mơ-eăm, hnoăng cheăng dêi rêm kăn ƀô̆, đảng viên drêng pêi hnoăng cheăng cho tơdroăng ki kal. Tơmâng khât troh tơdroăng cheăng kâ rơpŏng hngêi mâu kăn ƀô̆, mâu lêng, pêi tro luât pơkâ tŏng gum ƀă mâu lêng kuăn pơlê cho tơdroăng ki kal, pêi đi đo. Pêi tro mâu tơdroăng ki tối kơpêng cho tơdroăng ki kal, pơkâ troh tơdroăng cheăng krá kak ‘na tuăn mơno, tơdroăng pêi pro dêi rêm ngế kăn ƀô̆ mâu lêng drêng pơkâ troăng tơdroăng krá kak ‘na tuăn mơno, tơdroăng pêi pro dêi rêm ngế kăn ƀô̆ mâu lêng drêng pêi hnoăng cheăng”.

Tiô Trung tăng Nguyễn Trung Đức, Kăn hnê ngăn Đảng ủy, Chính trị viên tiêuh đoân DK1, Khu pơkuâ ngăn lêng Kơpong 2 Lêng tuk: tung hneăng hdrối kố nah, mâu kăn ƀô̆ Hngêi trá DK1 hiăng pơkuâ, hnê mơhno mâu tíu pêi cheăng pê klêi mâu tơdroăng pơkâ, tơdroăng cheăng pêi  hiăng pơkâ ƀă hên hnoăng ki tơƀrê mê cho: gak ngăn, tăng ngăn vâ ‘nâi tơdroăng a rơvâ plêng, a têa kơxĭ, teăm ‘nâi tơdroăng ki khu ‘mêi hriăn vâ pro tơ’nhiê a đông pơkuâ rêm râ vâ teăm mơdât tro tŭm  tơdroăng, ôh tá ăm kơdrâ tung tŭm tơdroăng.

Mơdêk ki tơƀrê ‘na hriâm tâp, hbrâ vâ tơplâ, pêi pro tro luât pơkâ, hriâm tro tiô luât, tŏng gum, veăng gum kuăn pơlê a têa kơxĭ, hriâm tâp mâu tơdroăng vâ tŏng gum drêng trâm xía vâ... Tơdroăng  cheăng  Đảng, tơdroăng ‘na kal kí, tơdroăng ‘na kế kâ, kih thuât châ tơbleăng tơdâng tơ’mô, ai pơxúa. Tơdroăng kal kí tuăn mơno dêi tíu pêi cheăng tơniăn, tơrŭm dêi rơpó, môi tuăn dêi rơpó, đông lêng tơniăn tŭm tơdroăng, ôh tá ăm ai ngế ki lâi tro pơxâu phâk  pro xôi luât. Trung tă Nguyễn Trung Đức, ăm ‘nâi: 

“Xua tơdroăng rêh ối xơpá hên tơdroăng ƀă hên tơdroăng kơdrâ ‘nâi hnoăng cheăng pơkuâ hnê dêi râ ủy, chi ƀô̆ tung mâu hngêi trá DK1 cho kal păng ‘nâng ƀă thế đi đo hbrâ rơnáu tăng ‘nâi plĕng tŭm tơdroăng, tối tơbleăng hdrối ‘nâi nhên hên tơdroăng hnê mơhno vâ  tơleăng mơnhên mâu tơdroăng xơpá, ‘nâi nhên hên tơdroăng pơkuâ hnê mơhno vâ tơleăng mơnhên hnê mơhno pêi pro tro mâu tơdroăng vâ kơdroh xơpá, pêi tơdroăng ki nếo, ki ôh tá khoh drêng ai mâu tuk tơviah prôk mot a kơpong têa kơxĭ pin rak ngăn; tơdroăng pêi pro tơdrêng, drêng ai khía, mơhot kân, tŏng xo drêng hên mơngế ki trâm xía vâ...”.

Mâu hngêi trá DK1 pro đông utâi utá a mâu kơpong têa kơxĭ peăng Hdroh tơnêi têa mê chiâng trâm hên tơdroăng xơpá tung tơdroăng tơbleăng mâu tơdroăng cheh tung hlá mơ-éa, hnê mơhno... má lối cho tơdroăng hbrâ vâ po hneăng hôp. La Đảng ủy, pơkuâ Tiêuh đoân DK1 hiăng xúa tơdroăng ki hriăn plĕng hên troăng hơlâ tơkŭm po klêi hneăng hôp. Đăi ŭy Bùi Thanh Hưng, Kăn hnê ngăn chi ƀộ, CTV hngêi trá DK1/9 tối.

“Chi ƀô̆ pro đông a kơpêng hngêi trá a tơdế têa kơxĭ, đi đo châ tơmâng hnê mơhno dêi Đảng ủy pơkuâ ngăn tiêuh đoân, dêi Đảng ƀô̆ kơpong. Tung hneăng hdrối Chi ƀô̆ ngin hiăng pê klêi hnoăng cheăng. Tơdroăng mê mơhno ƀă tơdroăng pê klêi hnoăng cheăng  kal kí dêi tíu pêi cheăng, ki môi tuăn tơniăn dêi mâu khu tơrŭm cheăng Đảng, drêng hiăng hnê nhên vâ ƀă tơdroăng tơplâ dêi rêm ngế đảng viên ƀă kuăn pơlê. Tơdroăng tơƀrê dêi hneăng hôp Chi ƀô̆ mâu hngêi trá cho mâu tơdroăng tuăn lo vâ kăn ƀô̆ mâu lêng dêi mâu hngêi tá DK1 thăm rế mơ-eăm tâ nếo khên tơnôu kring gak a tíu ki tơiu xiâm khiá khía kân, kring vế tơniăn tơnêi têa tung dế têa kơxĭ peăng Hdroh tơnêi têa”.

Tơdrêng ƀă tơdroăng hbrâ ƀă po hneăng hôp, ngế pơkuâ, chi ƀô̆ mâu hngêi trá hiăng đi đo pêi tro tơdroăng cheăng kal kí, tuăn mơno, luât pơkâ, bro tơniăn ki tơrŭm, môi tuăn khât; ngăn nhoăm tơdroăng pơkuâ hnê pê klêi tơdroăng cheăng kal kí rơtế ƀă mơdêk mâu tơdroăng mơhnhôk tơ’noăng. Mơdêk ‘nâ hbrâ kơchăng, hbrâ tơplâ, teăm tơleăng mơnhên tơdrêng mâu tơdroăng a têa kơxĭ. Mâu kăn ƀô̆ mâu lêng a mâu hngêi trá hbrâ,  kơhnâ, ai troăng rơhlâ tơplâ tơƀrê ƀă mâu ngế hriăn bro tơdroăng ôh tá tro, plâ ‘nhiê tơnêi têa, ai mâu pơkâ tơplâ mâu tơdroăng hriêăn pro ôh tá tro, hriăn vâ tơ’nhiê tơnêi têa, pro ôh tá tơniăn tung mâu kăn dêi mâu khu kơneăm hriăn pro, vâ xo rôh ki mê pro tơ’nhiê, ôh tá kâi kring vế tuăn mơno, luât pơkâ tơdroăng kal kí, troăng hơlâ dêi Đảng, kring vế luât pơkâ.

Rôh apoăng châ veăng hôp Chi ƀô̆ a hngêi trá, đảng viên Phạm Quang Dũng, Chi ƀô̆ Hngêi trá DK1/10 ăm ‘nâi:

“Mơhé hiăng veăng hôp chi ƀô̆ a tơnêi ‘lâng hên hdrôh, la veăng hôp rôh apoăng a hngêi trá tung dế têa kơxĭ, mơhé trâm hên tơdroăng xơpá, tơvâ tơvân tŭm, tơdroăng; la rêm đảng viên hiăng pêi tro tơdroăng cheăng hbrâ, chi ƀô̆ tơkŭm pêi tro tơdroăng, pro hlá mơ-éa, ƀă tơdroăng pro leh ôh tá phá klâi a tơnêi”.  

Hơngế ing tơnêi, ƀă tơdroăng pêi xơpá, tơvâ tơvân, ai hên tơdroăng pêi ki kal, rêm râ ủi, chi ƀô̆ hngêi trá DK1 thế hbrâ rơnáu tăng ‘nâi plĕng mâu tơdroăng, ‘nâi nhên hên tơdroăng pơkuâ pêi pro kơdroh xơpá, tơdroăng ki nếo, ki tá khoh la ƀă tơdroăng mơ-eăm dêi rêm râ ủi, pơkuâ mâu hngêi trá, rơtế ƀă mơno ivá, môi tuăn dêi kăn ƀô̆, đảng viên, rêm râ ủi, khu tơrŭm cheăng Đảng hiăng pêi tro tŭm tơdroăng hbrâ ƀă po hneăng hôp Chi ƀô̆ hneăng hơnăm 2025-2027.

Mâu tơdroăng hiăng châ pêi pro tung hneăng hdrối ƀă ki tơƀrê dêi hneăng hôp mâu chi ƀô̆ hngêi trá mơhno ivá tơná, ivá tơplâ dêi mâu khu tơrŭm cheăng Đảng Hngêi trá DK1 tối krê ƀă Kơpong 2 dêi Lêng tuk tối tơdjuôm. Mê xuân cho  tơdroăng ki mơhno ƀă ki loi khât dêi Đảng, Tơnêi têa ƀă kuăn pơlê ƀă mâu lêng kring vế hnoăng pơkuâ a tơnêi tung dế têa kơxĭ tơdế Tơnêi têa.