Tiô tối tơbleăng pơtroh ăm Hneăng hôp, 5 hơnăm hdrối, Đảng ƀô̆ kong pơlê Quảng Ngãi ƀă kong pơlê Kon Tum hdrối nah hiăng hnê mơhno kuăn pơlê mơ-eăm pêi cheăng, pêi châ tơbrê hên tơdroăng kal ƀă tâi tâng mâu tơdroăng ‘na kal kí, cheăng kâ, túa lĕm tro, cheăng lêng ƀă kring vế tơniăn. Ƀă tơdroăng mơjiâng Đảng ƀă tơdroăng kal kí, Đảng ƀô̆ kong pơlê hiăng tơkŭm hnê pêi châ tơƀrê mâu pơkâ dêi Tíu xiâm ƀă dêi kong pơlê, pê klêi tơdroăng cheăng xing xoăng tơkŭm po, khu kăn, mơjiâng mâu kăn ƀô̆, mơjiâng khu tơrŭm cheăng Đảng rơdêi, ai hên túa pêi cheăng ki nếo, túa pêi tro ‘ló, tơbrê tung tơdroăng mơjiâng Đảng.

Tung kơvâ cheăng kâ - pơlê pơla, kong pơlê Quảng Ngãi pê klêi ƀă pê klêi luâ kơlo mâu pơkâ ki kal, ki tâk gá tâng riân châ 7,3% tung hơnăm, ối má 10/34 to kong pơlê, pơlê kong kân. Xo liăn ngân tơnêi têa đi đo châ luâ tối hdrối, tung 5 hơnăm pêi châ kơpêng 165.000 rơtal liăn. Kong pơlê hiăng pêi klêi Tơdroăng tah hngêi pơtân hngêi xi kơchoh ƀă tâi tâng kơxô̆ liăn lối 9.000 toăng hngêi.  Tơdroăng cheăng xăm kơtiê châ tơbleăng pêi tơdang tơ’mô, kơdroh riân 2,7% tung hơnăm; tung mê, kong ngo kơdroh 4,64% tung hơnăm.

Hneăng hôp ‘nâi nhên, mơ-eăm troh hơnăm 2030, Quảng Ngãi cho kong pơlê mơnhông tơƀrê, chiâng môi tơdroăng tâk ki kal a  kơpong tơdế tơnêi têa - Tây Nguyên. Tung mê, mơ-eăm tâk  tâi tâng tơmeăm tung kong pơlê (GRDP) tâng riân pơla hơnăm 2026-2030 châ 10% tung hơnăm tơngi klêng. Troh hơnăm 2030, (GRDP) tâng riân rêm ngế dâng 6.900-7.000 dollars. Troh hơnăm 2030, mơ-eăm ôh tá ai xếo rơpŏng kơtiê.Tối tơbleăng kal kí pơtroh ăm hneăng hôp mâu kăn Đảng ƀô̆ kong pơlê roh má 1, hneăng hơnăm 2025-2030 ‘nâi nhên 5 tơdroăng  ki kal ƀă pái tơdroăng tơƀrê.

Jâ Bùi Thị Quỳnh Vân, Kăn hnê ngăn Tỉnh ủy kong pơkê Quảng Ngãi tối: Hneăng hôp Đảng ƀô̆ kong pơlê cho hneăng hôp tuăn loi, dêi ki mâ ngăn ƀă pêi pro:

“Ôh tá tơxâng ngăn mâu tơdroăng hiăng pêi châ tơƀrê, Đảng ƀô̆ kong pơlê đi đo tô tuăn ‘na tơdroăng kơ êng: Quảng Ngãi dế ối a lâi tâng vâ pơchông ƀă kong pơlê ki ê tung lâp tơnêi têa? Khên tơnôu tối nhên tơdroăng ki hlo la pêi hâi teăm troh, tối nhên kơlo mơnhông tơƀrê a Quảng Ngãi hiăng tơxâng ƀă tơmeăm khoăng ai hlâu, hiăng pêi mâu tơdroăng cheăng? Tơdroăng ki tơƀrê mê tá châ tơ’mot kơxô̆ liăn, tơdroăng hơniâp ro châ kŭm a rêm ngế kuăn pơlê há lơ ôh? Ing mê, vêh hriâm mâu tơdroăng ki pơxúa khât; ‘nâi nhên pơkâ, tơdroăng cheăng, troăng hơlâ, mâu pơkâ ki kal kum Quảng Ngãi mơnhông tơbrê’’

Tơbleăng hnê mơhno Hneăng hôp, ngế cheăng tung khu xiâm Kal kí, phŏ ngế pro xiâm hnê ngăn tơnêi têa pôa Nguyễn Hòa Bình  tối nhên, khĕn kơdeăn khât mâu tơdroăng mơ-eăm dêi Đảng ƀô̆ mâu kăn ƀă kuăn pơlê kong pơlê Quảng Ngãi hneăng hdrối kố nah, mơhno mâu tơdroăng ki u ối, ki ôh tá tơƀrê kal thế tơkâ luâ.

‘Na tơdroăng mơjiâng Đảng, Phŏ Ngế pro xiâm hnê ngăn tơnêi têa tối nhên ngăn mơjiâng Đảng ƀô̆ ƀă tơdroăng kal kí krúa, rơdêi, cho tơdroăng cheăng pêi ki xiâm; malối tơmâng mơjiâng khu kăn ƀô̆  tơdâng ƀă tơdroăng cheăng.

Tơdroăng mơnhông cheăng kâ - pơlê pơla hneăng la ngiâ dêi kong pơlê Quảng Ngãi, pôa Nguyễn Hoà Bình - Phŏ Ngế pro xiâm hnê ngăn tơnêi têa pơkâ thế mơhno troăng mơnhông cheăng ƀă kơmăi kơmok tiô ki rơdâ, kŏng ngê̆ ki dâi lĕm, xo kơpong cheăng kâ Dung Quất pro xiâm; mơnhông tơrŭm ƀă kơpong cheăng kâ po rơdâ Chu Lai vâ mơjiâng môi tíu xiâm cheăng ƀă kơmăi kơmok ki kal dêi tơnêi têa.

‘Na ôm hyô, kong pơlê thế pêi lo mâu tơmeăm khoăng ki tơviah, tơdjêp ƀă ’’kong ‘’ ƀă ‘’ Têa kơxĭ”, pêi tiô troăng hơlâ ‘’môi tíu troh, pái tơnêi têa’’, pro inâi chuăn Lý Sơn, tơmeăm khoăng  lĕm, hyôh kong prâi Măng Deang ƀă ki pơxúa dêi pái hơlâ troăng Đông Dương chiâng môi tơmeăm ôm hyô tơdjêp ki tơviah. Phŏ Ngế pro xiâm hnê ngăn tơnêi têa tối nhên:

“Quảng Ngãi ai môi tơdroăng ki rơdêi cheăng kâ - kal kí malối a kơpong pái hơlâ troăng Đông Dương, cho hơlâ troăng tơdjêp ƀă Tây Nguyên lo a têa kơxĭ. A hâk mơnê tuăn tơmiât dêi kong pơlê drêng mơnhên pơkâ mơdêk tâk 10% tơngi klêng. Mơhé ti mê, kố cho môi pơloăng mơnúa kân, môi tơdroăng ki mơnúa ƀă khên tơnôu ƀă ivá pơkuâ dêi Khu kăn pơkuâ hnê ngăn Đảng. Kăn hnê ngăn thế tơmiât nhên trâu tâ, pêi kân tâ, xua kuăn pơlê. Thế tah lôi tuăn tơmiât  ton nah ki  kơnôm to a tơdroăng ‘no liăn pêi cheăng, tơkôm Tíu xiâm kĭ tơdroăng tơkêa bro ƀă ăm liăn ngân vâ pêi. Luât pơkâ tơ’lêi hlâu vâ  pơtối rak vế ƀă mơnhông ivá cheăng dế hên tung Kuăn pơlê, tung khu mơdró nếo ƀă troăng hơlâ pêi ‘lo tro drêng kố. Ƀă tơmeăm ai hlâu hên hĭn klêi tơ’mot tơdjuôm ƀă púi vâ dêi chal nếo, á pơkâ thế Hneăng hôp tơpui tơno, mơjiâng Pơkâ nhên, chiâng xúa pêi, pơkâ mơhno troăng hơlâ pêi vâ tơƀrê, tơdâng tơ’mô ƀă mơ-eăm kal kí hên tâ nếo, mơ-eăm pêi châ, thăm nếo luâ pơkâ tâk tiô ki hiăng pơkâ”.