VOV4.Xơ Đăng - Kơxê lơ 6/3 a Đà Nẵng, tơkŭm po Hneăng hôp hnê mơhno má môi Hô̆i đong kuăn pơlê mâu kong pơlê, pơlê kong kơdrâm kơpong pá hdroh peăng tơdế tơnêi têa ƀă Tây Nguyên roh má môi, hneăng hơnăm 2021 – 2026. Mâu kăn teăng mâ hiăng tơmâng tơbleăng mơ-éa chêh tối dêi Khu hnê mơhno má môi Hô̆i đong kuăn pơlê mâu kong pơlê, pơlê kong kơdrâm mơnhên ‘na 3 tơdroăng.

Má môi cho ‘’Túa ki rơkê tơtro tung mơdêk ki hôm, châ tơƀrê roh hôp Khu hnê mơhno má môi Hô̆i đong kuăn pơlê râ kong pơlê ‘na mâu tơdroăng tiâ tối dêi mâu kơ koan, khu tơrŭm cheăng, ngế krê tiô Luât khu râ kăn pơkuâ kong pơlê’’. Tơdroăng ki má péa cho ‘’Tơdroăng pơ’lêh nếo tung troăng pêi, mơdêk châ tơƀrê tơdroăng séa ngăn, mơnhên tơdroăng tơbleăng, tơdroăng tơkêa bro, mơ-éa chêh hdrối pơkâ tơbleăng a hneăng hôp’’.

Tơdroăng ki má 3 cho ‘’Túa ki rơkê tơtro, troăng mơdêk hôm, châ tơƀrê tơdroăng séa ngăn, séa mơnhên dêi mâu khu cheăng dêi Hô̆i đong kuăn pơlê’’. Xông tơpui mơgêi Hneăng hôp, pôa Trần Thanh Mẫn, Kăn xiâm phŏ hnê mơhno má môi Kuô̆k hô̆i pơkâ thế Khu hnê mơhno má môi Hô̆i đong kuăn pơlê mâu kong pơlê kal pơtối mơnhông hiâm mơno ‘’hbrâ xêh, tơmiât pêi rơkê ƀă ƀeăn ƀĕng’’ tung tơdroăng pêi pro tơdroăng cheăng, hnoăng cheăng; séa ngăn mâu pơ’lêh nếo dêi Kuô̆k hô̆i vâ xúa, rơtế tơtro ƀă rêm kong pơlê.

A Sa Ly tơplôu ƀă tơbleăng