Châ Tổng Liên đoân pêi cheăng Việt Nam rah tơkŭm po hneăng hôp Khu 10 Liên đoân Pêi cheăng kong pơlê kơpong Nam trung ƀô̆ ƀă Tây Nguyên, tung 2 hâi hâi lơ 25 ƀă 26/7, a pơlê kong kơdrâm Kon Tum tơkŭm po Hneăng hô̆p Kŏng đoân kong pơlê Kon Tum roh má XI, hneăng hơnăm 2023 – 2028.

Ƀă troăng pêi ‘’Hơ’lêh nếo – Kuăn pơlê pơkuâ dêi hnoăng cheăng – Rŭm môi tuăn – Mơnhông mơdêk’’, Hneăng hôp Kŏng đoân kong pơlê Kon Tum roh má XI, hneăng hơnăm 2023 – 2028 hiăng mơgêi, mơnhên tơdroăng pêi pro Pơkâ Hneăng hôp roh má X, hneăng hơnăm 2018 – 2023; mơnhên pơkâ pêi xiâm, troăng la ngiâ, hnoăng cheăng tơdroăng pêi cheăng kŏng nhân, viên chưk, mơngế pêi cheăng ƀă tơdroăng pêi cheăng kŏng đoân hneăng hơnăm 2023 – 2028.

Hneăng cheăng hiăng hluâ mơhé trâm hên pá puât, pơloăng mơnúa ki má lối cho tơdjâk dêi pơreăng kân COVID-19, laga tơdroăng pêi cheăng dêi kŏng đoân kong pơlê Kon Tum châ tơƀrê kal khât. Mâu râ kŏng đoân pêi pro lĕm tro tơdroăng teăng mâ, gâk kring hnoăng pơkuâ, ki pơxúa tiô luât, tơxâng dêi đoân viên ƀă mơngế pêi cheăng.

Hneăng hôp Kŏng đoân kong pơlê Kon Tum roh má XI, hneăng hơnăm 2023 – 2028 hiăng rah xo Khu pơkuâ Liên đoân pêi cheăng kong pơlê hneăng nếo ƀă 32 ŭy viên; rah xo 8 kăn teăng mâ lăm veăng Hneăng hôp má XIII Kŏng đoân Việt Nam. Pôa Rơ Chăm Long pơtối châ rah xo to pro Kăn hnê ngăn Liên đoân pêi cheăng kong pơlê Kon Tum.