Kơxo hâi lơ 3/9, a Hngêi Kuô̆k hô̆i, Khu xiâm pơkuâ tơdroăng kal kí, Khu pơkuâ hnê ngăn Đảng tơkŭm po Hneăng hôp lâp tơnêi têa hriăn plĕng, hriâm tâp, hlê plĕng ƀă tơbleăng pêi pro mâu Pơkâ, Tơdroăng pơkâ dêi Khu xiâm pơkuâ tơdroăng kal kí.

A hneăng hôp, mâu kăn tơmâng hlê plĕng 6 túa hlá mơ-éa chêh ƀă châ tối nhên tơdroăng xiâm, ki kal, mâu tơdroăng ki nếo tung tơdroăng Pơkâ, Tung tơdroăng pơkâ dêi Khu xiâm pơkuâ tơdroăng kal kí, tơdrêng amê, pro trâu hơngế mâu tơdroăng tiô rêm kơvâ cheăng. Tơpui hnê mơhno a hneăng hôp, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối nhên, tá 6 mơ-éa chêh hiăng nhên troăng hơlâ, pơkâ; tơdroăng ki pơkâ cho tơkŭm pêi pro ƀă hnoăng cheăng ngế ối a ko. Rêm kơxop hlá mơ-éa thế chiâng tơdroăng ki nhên, ai ngế pôu râng hnoăng cheăng, châ mơnhên ƀă tơdroăng ki châ tơƀrê; mơ'nui thế pro tơnêi têa rơdêi tâ, Kuăn pơlê rêh ối lĕm tro tâ, loi tơngah krá tơniăn tâ.

Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối nhên, tâi tâng 6 túa mơ-éa chêh rơtế chêh troh mơdêk ivá pơkuâ ngăn, ivá tơplâ dêi Đảng; mơjiâng khu kăn ƀô̆ djâ troăng ahdrối, djâ troăng lĕm, khên pôu râng hnoăng cheăng; pơkuâ rơkê; tơkŭm nếo tíu mơnhông mơdêk; djâ ôm hyô chiâng ivá mơdêk, mơnhông tâi tâng ivá hdroâng mơngế. Kăn xiâm pơkuâ hnê ngăn Đảng, Kăn xiâm hnê ngăn tơnêi têa pơkâ thế, klêi kơ'nâi Hneăng hôp, mâu khu râ kăn pơkuâ, kơ koan, kong pơlê, ngế pơkuâ thế mơnhên hnoăng cheăng ki xiâm; pơcháu tro mơngế, tŭm hnoăng, ivá; nhên tơmeăm khoăng, tơdroăng pêi pro, hnoăng cheăng.