Hdrối mê, tung hâi hnah, lơ 21/1, Hneăng hôp pơtối pêi cheăng plâ hâi a Hngêi hôp vâ tơpui tơno ‘na mâu mơ-éa ki kal Hneăng hôp. Tung roh pêi cheăng kơxo, hiăng ai 15 kăn teăng mâ ối tung mâu khu râ kăn teăng mâ, kơ koan xông tơpui. Tung roh peăng kơxê, ai 15 kăn teăng mâ ối tung mâu khu râ kăn teăng mâ, kơ koan xông tơpui. Mâu rơkong tơpui tham luận tơkŭm a mâu tơdroăng xiâm ki xiâm dêi Mơ-éa ki kal ƀă mâu tơdroăng kal châ kuăn pơlê, kăn ƀô̆, đảng viên rơhêng vâ ‘nâi plĕng.

Tơdroăng tơpui tơno kơdrâm phiu ro, tơdrăng, kuăn pơlê pơkuâ dêi hnoăng cheăng. Khu râ kăn Hnê ngăn Hneăng hôp nhuô̆m mơnhên, kheăn kơdeăn mâu tơdroăng xiâm tham luâ̆n ƀă mâu rơkong xông tơpui tá hiâm mơno, tuăn ngôa rơkê dêi mâu kăn teăng mâ; tơdrêng amê, hnê mơhno Khu hriăn pleăng Mơ-éa ki kal séa ngăn, tơmâng xo mâu rơkong tơpui ki tro vâ kêi đeăng mơ-éa chêh hdrối Mơ-éa ki kal tơbleăng Hneăng hôp pơkâ.

Ƀă mâu tơdroăng pâ thế inhên, ki phá tơ-ê, Khu kăn hnê ngăn tơmâng xo tâi tâng, pơtroh Khu pơkuâ xiâm Đảng hneăng má XIV séa ngăn, inhên tung mâu Pơkâ chuyên đê, tơdroăng pêi Tơdroăng pơkâ ƀă kêi đeăng tơdroăng xiâm Tơdroăng pơkâ Hneăng hôp má XIV dêi Đảng. Khu râ kăn hnê ngăn klêi kơ’nâi tơmâng xo rơkong tơpui mâu khu râ kăn teăng mâ hiăng tơbleăng Hneăng hôp ‘na pơhlêh tơdroăng pêi cheăng dêi Hneăng hôp 14 dêi Đảng. Hneăng hôp hiăng têk kŏng môi tuăn pro kơdroh 1,5 hâi pêi cheăng tâng pơchông ƀă tơdroăng tối hdrối apoăng.